«Фулад» ва Ўзбекистон миллий терма жамоаси дарвозабони Ўткир Юсупов Нарзулла Сайдуллаев каналига берган интервьюсида ўзининг келгуси режалари, Яқин Шарқдаги ўйин амалиёти ва Суперлигага қайтиши эҳтимоли ҳақида тўхталиб ўтди. Унга кўра, ҳозирча «Навбаҳор»га қайтиши масаласида жиддий муҳокама ёки расмий таклиф йўқ.
Юсупов ўз изоҳида шундай деяди:
— «Навбаҳор»га қайтади деган гаплар ҳозирча асосга эга эмас. Менинг ‘Фулад’ билан ёзгача амал қиладиган шартномам мавжуд. Агар, тасодифан, клуб мени қўйиб юборса ҳам, шундоқгина қайтиб кетавермайман — менга доимий ўйин амалиёти бор жамоа керак. Чунки мен эндигина жароҳатдан тузалдим ва олдимизда Жаҳон чемпионати каби улкан мусобақа турибди», — дея таъкидлади дарвозабон.
Дарҳақиқат, Ўткир Юсуповнинг соғлиги ва ўйин амалиёти бугунги кун талабларида жуда муҳим. Айниқса, миллий жамоа учун асосий дарвозабонлардан бири сифатида унинг тайёргарлик даражаси муҳим аҳамият касб этади.
Маълумки, Юсупов бир неча ой аввал Эрон ва Ўзбекистон терма жамоалари ўртасидаги CAFA финалида жиддий жароҳат олган, шу боис бир муддат майдондан ташқарида қолган эди. Ҳозирда у тикланиш жараёнини якунига етказиб, яна юқори темпда машғулотларни давом эттирмоқда.
Юсуповнинг Суперлигага қайтиши ёки ташқи чемпионатда қолишини кузатаётган мухлислар унинг ҳар бир баёнотини қизиқиш билан ўқимоқда. Ҳар ҳолда, дарвозабоннинг келажакда қаерда ўйнаши нафақат клуб даражасида, балки Ўзбекистон терма жамоасининг мусобақалардаги муваффақиятида ҳам катта роль ўйнайди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
