Европа Чемпионлар Лигасининг 5-туридаги энг кутилган қарама-қаршиликлардан бири — «Челси» ва «Барселона» ўртасидаги тўқнашув олдидан каталонлар бош мураббийи Ханс-Дитер Флик ўз фикрларини баҳам кўрди. Мураббийнинг айтишича, бу беллашув нафақат мушкул синов, балки жамоанинг реал имкониятларини баҳолаш учун ҳам муҳим имкониятдир.
— «Челси»га қарши ўйнаётганимиздан мамнунман. Бу ўйин биз учун ҳақиқий синов вазифасини бажаради. Биз доим рақибга қараб тактик ёндашувни ўзгартирамиз, ҳар бир учрашувда қандай имкониятларимизни ишга солиш мумкинлигини кўриб чиқамиз. Ҳар бир беллашув алоҳида аҳамиятга эга», — деди Флик.
Фликнинг таъкидлашича, «Челси» ҳозирги кунда дунёнинг энг юқори баҳоланадиган жамоаларидан бири. Уларнинг таркиби, ўйин услуби ва мураббийи Европа футболида катта эҳтиром қозонган.
— «Челси»нинг ривожланиш модели ажойиб. Жамоада кучли, техник жиҳатдан етук футболчилар ва юқори малакали мураббий бор. Улар ёш, динамик, жонли футбол намойиш қилади. Биз эса уларга қарши ўзимизнинг энг яхши ўйинимизни кўрсатишимиз шарт. Ўз кучимизга ишонамиз ва майдонда охиригача курашамиз», — дея қўшимча қилди Флик.
Катта қизиқиш уйғотган «Челси» — «Барселона» учрашуви бугун соат 01:00 да старт олади. Мухлислар эса икки гранд ўртасидаги кескин беллашувдан катта томоша кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
