Европа Чемпионлар лигаси умумий босқичининг бешинчи турида «Барселона» Лондонга сафар уюштириб, «Челси»га қарши жуда оғир кечган ўйинда иштирок этди. Каталонияликлар мухлислари бу гал жамоадан кутилмаган таркибий хатолар ва ҳимоядаги жиддий узилишлар сабаб 0:3 ҳисобида йирик мағлубиятни томоша қилишга мажбур бўлишди.
Ўйиннинг илк қисмидаёқ ҳимоядаги беэътиборлик «Барса»ни жиддий қийин ҳолатга солиб қўйди. Жюль Кунде ўз дарвозасига ноаниқ ҳаракат орқали автогол киритиб қўйди. Орадан кўп ўтмай, жамоа сардори ва марказий ҳимоячи Рональд Араухо қисқа вақт ичида икки бор огоҳлантирилди ва биринчи бўлимдаёқ майдондан чиқариб юборилди.
Бир киши кўп бўлиб ўйнаш имкониятига эга бўлган «аристократлар» иккинчи таймда ташаббусни тўлиқ ўз қўлига олди ва рақиб дарвозасига яна икки гол киритишни уддалади. «Барса» эса рақам жиҳатидан камлик қилаётган пайтда ҳужумни тўғри йўлга қўя олмади, ҳимоя эса ҳамон беқарор кўринишда қолди.
Флик: “Араухо бунақа қарор қабул қилмаслиги керак эди”
Учрашувдан кейин каталонияликларнинг бош мураббийи, тажрибали герман мутахассиси Ханс-Дитер Флик учрашувдаги ҳал қилувчи хатолар, айниқса Рональд Араухонинг икки сариқ карточка олиш ҳолати бўйича фикр билдирди:
«Биринчи сариқ карточка берилган вазиятга ҳозир баҳо бера олмайман. Ушбу эпизодни такроран кўриб чиқишим ва Рональд билан алоҳида суҳбат ўтказишим керак.
Иккинчи вазиятда эса ҳимоячимиз бунақа қарор қабул қилмаслиги лозим эди. Бу ўринда бундай ҳаракат талаб этилмайдиган ўйин вазияти эди», — деди Флик.
Рональд Араухо биринчи бўлимнинг 32-дақиқасида бош ҳакам Славко Винчич билан тортишгани учун оғоҳлантирилди. 44-дақиқада эса «Челси» футболчиси Марк Кукурельяга нисбатан ўта қўпол ҳаракат қилгани учун иккинчи сариқ карточка келиб чиқди. Бу эса ўйин тақдирини амалда олдиндан белгилаб қўйди.
Ҳимоядаги бундай хатолар ва тартибсизликлар «Барселона»нинг бу мавсумдаги энг омадсиз кечаларидан бирига айланди. Энди жамоа навбатдаги ўйинларда хатолардан хулоса чиқариши ва мавсумдаги мақсадлар учун янада қаттиқроқ курашиши керак.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
