Ўзбекистонлик шахмат даҳоси Жавоҳир Синдоров Ҳиндистоннинг Гоа шаҳрида бўлиб ўтган Жаҳон кубоги финалида хитойлик Вей И устидан зафар қозониб, тарихий натижа қайд этди. Икки кунга чўзилган кескин баҳсларнинг 25 ноябр кунги асосий ўйинларида муроса йўли танланган эди (0,5-0,5, 0,5-0,5). Натижада, ғолиб 26 ноябр куни қўшимча тай-брейк баҳсларида ҳал қилинди ва иккинчи партияда ҳамюртимиз якуний ғалабага эришди.
Тарихий иккинчи чемпион
Бу ғалаба билан Синдоров ушбу нуфузли турнирда чемпион бўлган иккинчи ўзбекистонлик шахматчига айланди. Аввалроқ, 2004 йилда Рустам Қосимжонов ҳам FIDE Жаҳон Кубогида ғолиб чиққан эди. Ушбу мусобақа Халқаро Шахмат Федерацияси (FIDE) ҳимояси остида ҳар икки йилда бир марта ўтказиладиган энг йирик нокаут тизимидаги шахмат мусобақасидир. Турнирнинг мукофот жамғармаси 2 миллион долларни ташкил этади ва ғолиб 120 минг доллар олади.
Энг асосий соврин: Даъвогарлар турнири
Энг муҳими, Синдоров финалга чиқиш орқали 2026 йилги Даъвогарлар турнирига (Жаҳон тожи учун курашнинг асоси) йўлланмани кафолатлади. Бу йўлланмаларнинг фақат учтаси ўйналади.
Қайд этиш жоизки, бу йилги турнир яримфиналида ўзбекистонлик икки шахматчи – Жавоҳир Синдоров ва Нодир Ёқуббоев ўзаро тўқнаш келишган эди. Синдоров ушбу баҳсда ғолиб чиқди, аммо Ёқуббоев 3-ўрин учун кечган баҳсда россиялик Андрей Есипенкога ютқазиб, имкониятдан фойдалана олмади.
Аввалги йилларда бу мусобақада Магнус Карлсен, Владимир Крамник каби дунёнинг энг сара гроссмейстерлари ғолиб чиққан. Синдоровнинг бундай юқори даражадаги мусобақадаги зафари ўзбек шахматининг жаҳон миқёсидаги мавқеини янада мустаҳкамлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
