“Барселона” бош мураббийи Ханс-Дитер Флик Чемпионлар лигасининг 5-турида “Челси”га учралган йирик мағлубият (0:3) ҳақида фикр билдириб, жамоадаги хато ва муаммоларни очиқ тан олди. Унинг таъкидлашича, ўйиннинг бошидаги имкониятлар голга айлантирилмагани, кейинчалик эса бир киши кам бўлиб ўйнаш жамоага катта босим келтирган.
“Бизда ҳисобни очиш учун яхши вазият бор эди, аммо уни голга айлантира олмадик. Бу босқичда бундай имкониятдан фойдаланмаслик рақибга катта устунлик беради. Араухо майдондан четлатилгандан кейин эса вазият янада оғирлашди — бундай даражадаги рақибга қарши ўн киши билан узоқ вақт ўйнаш жуда машаққатли”, – деди Флик.
Унинг таъкидлашича, жамоа айрим онларда ижобий ҳаракатлар кўрсатган, аммо улар умумий манзарани ўзгартира олмаган.
“Айрим яхши дақиқалар бўлди, лекин улар кам бўлди. Биз тўпни тез-тез йўқотдик, ҳатто энг оддий узатмаларда ҳам хатолар кўп учради. Бу жиҳатларни жиддий таҳлил қилишимиз лозим. Бир киши кам бўлиб қанча ўйнаганимиз аниқ эсимда йўқ, лекин бу жуда узоқ вақт бўлди”, – деди мураббий.
Фликка кўра, жамоа ҳали ҳам ЧЛда кучли саккизликка кириш учун ҳаракатни давом эттиради, бироқ бу осон бўлмайди:
“Кучли саккизликка йўл олиш жуда мушкул, лекин биз охиригача курашамиз”.
“Барселона” энди келаси тургача хатоларни бартараф этиб, жамоавий ўйинни қайта тиклашга ҳаракат қилади. Мухлислар эса Флик жамоаси қандай тикланишини кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
