Чемпионлар лигасида “Барселона”га қарши катта ғалаба (3:0) қозонган “Челси” бош мураббийи Энцо Мареска ўйиндан кейинги фикрлари билан бўлишди. Унинг сўзларига кўра, натижа тасодиф эмас — жамоа тайёргарлиги, интизоми ва ўйиндаги иштиёқи бунга тўлиқ хизмат қилди.
Беллашувнинг илк қисмида каталонияликлар ҳимоячиси Рональд Араухо суръати баланд эпизоддан сўнг майдондан четлатилганди. Бироқ Мареска бу ҳолатни ўйин тақдирига катта таъсир қилган омил сифатида баҳоламади:
“Биз 11га 11 шароитида ҳам аъло ўйнадик. “Барса” тўпга эгалик қилишда ўзини жуда эркин ҳис қилади, лекин тўпсиз ҳолатда улар унчалик ҳам ишончли эмас. Биз буни ҳис қилиб, уларнинг бўш зоналарини топдик”, – деди Мареска.
Мураббийнинг таъкидлашича, “Челси” нафақат учта гол урди, балки яна камида уч марта дарвозага йўлланган голлари VAR сабаб бекор қилинди. Бундан ташқари, яна бир қатор хавфли вазиятлар яратилган.
“Ўйиндан кейин футболчиларга айтиб ўтдим: ҳозирги энг муҳим жиҳат — тикланиш. Жума кунидан бошлаб барча диққатни “Арсенал”га қаратиш керак. Импульсни сақлаб қолиш муҳим, чунки ғалабадан кейин тикланиш ҳар доим осон кечади”, – дея қўшимча қилди мураббий.
Маресканинг бу баёноти “Челси” жамоасининг ўйин услуби тобора шаклланаётганини ва муваффақиятлар давом этиши учун ички ритмни йўқотмаслик энг муҳим омил эканини кўрсатиб турибди. Лондонликлар энди Премьер лигадаги навбатдаги катта синов — дербида “Арсенал”га қарши баҳсга тайёрланмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
