Англия Премьер-лигасининг 13-турида жорий мавсумдаги асосий чемпионлик даъвогари бўлган "Манчестер Сити" клуби ўз уйида "Лидс" футболчиларини қабул қилади. Хосеп Гвардиола шогирдлари "Ньюкасл" ва Чемпионлар лигасида "Байер"дан учралган аламли мағлубиятлардан кейин мухлислар олдида ўзини оқлаш мақсадида фақат ғалаба учун майдонга тушади. Айниқса, таркибда ўнлаб ўзгаришлар қилган бош мураббийнинг танқид остида қолишига сабаб бўлган "Байер"га қарши мағлубият жамоага қаттиқ таъсир қилди.
Жавобгарликни зиммасига олган Гвардиола барча шогирдларига ишонишини билдирди. "Манчестер Сити" фаолиятини ёритувчи cityxtra.co.uk манбаси бўлажак ўйин учун тахминий таркибни эълон қилди. Унга кўра, дарвозага италиялик гигант Жанлуижи Доннарумма қайтади.
Ҳимояда Абдуқодир Ҳусановга ишонч
Энг муҳим янгиликлардан бири, ўзбек легионери Абдуқодир Ҳусанов жароҳатдан тўлиқ тузалди ва Матеус Нуньес билан ўнг қанот ҳимоясида курашишга тайёр. Манба бу сафар ишонч Ҳусановга билдирилишига умид қилмоқда. Марказий ҳимояда Рубен Диас Йошко Гвардиол билан бирга етакчилик билан ажралиб турди ва бу дуэт энг ишончли марказий ҳимоячилар жуфтлиги мақомини сақлаб қолиши кутилмоқда. Чап қанотда Нико О'Рейли эса ҳимояни мустаҳкам ушлаб турибди.
Клуб сардори Бернарду Силва ва мухлисларнинг севимлиси Фил Фоден ярим ҳимоя марказини бошқариши аниқ.
Холанд рекорд ортидан, Доку — даҳшат
Ҳужум чизиғида ёзда "Лион"дан келган Райан Шерки Фил Фоден билан ажойиб ҳамкорликни йўлга қўймоқда. Марказий ҳужумчи Эрлинг Холанд эса Премьер-лигадаги 100-голини уриб, тарихга киришга интилмоқда. Қанотда Жереми Доку ўзига ишонган вақтда тўхтатиш деярли имконсиз бўлиб, асосий таркибда бўлиши керак.
Тахминий таркиб: Доннарумма; Ҳусанов, Диас, Гвардиол, О'Рейли; Нико, Бернардо, Фоден; Черки, Хааланд, Доку.
Учрашув 29 ноябрь куни Тошкент вақти билан 20:00 да бошланади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
