МЛС кубоги ярим финалида “Интер Майами” ўз майдонида “Нью-Йорк Сити”ни қабул қилди ва учрашувни 5:1 ҳисобида ишончли тарзда ҳал этди. Бу ғалаба нафaқат жамоа учун, балки Лионель Месси учун ҳам навбатдаги туманли юксалиш нуқтаси бўлди.
Саккиз карра “Олтин тўп” эгаси бўлган аргентиналик юлдуз яна бир бор футбол оламидаги ўзига хос маҳорат ва ижодкорлигини намоён этди. У ўйин давомида жамоадошига аниқ голли пас бериб, “Интер Майами”нинг устунлигини мустаҳкамлади. Аммо энг муҳими — айнан шу ассист Мессини бутун жаҳон футболида мутлақ рақамлар соҳиби сифатида яна ёдга солди.
Ушбу пас Мессининг бутун карьераси давомидаги 405-ассисти сифатида тарихга кирди. Шундай қилиб, у профессионал футбол тарихида 400тадан ортиқ голли пас узатган ягона ўйинчига айланди. Илгариги кўрсаткич Венгрия футболи афсоналаридан бири — Ференц Пушкашга тегишли бўлиб, у 404 та ассист билан етакчилик қилиб келаётган эди.
Месси эса бу маррани ҳам ортда қолдирди — энди унинг ҳар бир янги паси автоматик равишда янги рекорд, янги саҳифага айланади.
38 ёшли футболчи ҳали ҳам юқори формасини йўқотмаган. Жорий мавсумнинг ўзида у барча мусобақаларда 40 та ўйинда иштирок этиб, рақиб дарвозаларини 38 бор ишғол қилди ва 22 марта ассист узатишга муваффақ бўлди. Бу кўрсаткич унинг ҳали ҳам дунё футболида энг таъсирли фигуралардан бири эканини исботлайди.
Мессининг ҳаракатлари, ўйинни ҳис қилиш қобилияти ва ҳар бир вазиятни ўз фойдасига буриш маҳоратлари футболни севувчи миллионлаб мухлисларни яна бир бор мафтун этмоқда. Унинг ҳар бир ўйини янги рекорд, янги тарих бўлиб бормоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
