“Манчестер Сити” бош мураббийи Хосеп Гвардиола Премьер-лигадаги “Лидс”га қарши ўйиндан кейин Эрлинг Холанд билан бўлган самимий ва бироз ҳиссий мулоқот ҳақида журналистларга батафсил тўхталди.
Ҳамманинг эътибори айнан бир нуқтада эди — Холанднинг Англия чемпионатидаги 100-голини кутиш. Бир гол — шунчаки рақам эмас, балки Премьер-лигада энг тез 100 та тўп урган футболчи сифатида янги тарих ёзиш имконияти. Аммо норвегиялик ҳужумчи бу баҳсда рақиб дарвозасини ишғол қила олмади.
Гвардиола вазиятга кенгроқ баҳо берди:
— Эрлинг шунчаки бу маррани забт этади. Келаси учрашувда 100-тўпини киритишига ишонаман. Биз у билан дам олиш, тикланиш ва жисмоний ҳолат ҳақида суҳбатлашдик. Унинг танаси жуда улкан, шу боис тўлиқ тикланиш унга бошқа футболчиларга нисбатан кўпроқ вақт талаб этади. Дам олиш фақат оёқларда эмас, бошда ҳам, — деди мураббий.
Мураббийнинг таъкидлашича, Холанднинг организми Фил Фоден ёки Жереми Докуикидан фарқ қилади, тез тикланмайди. Уларда тикланиш жараёни тезроқ кечади. Эрлинг эса, барваста йигит. Шунга қарамай, барча ишонади — у “Сити”нинг кейинги муҳим учрашувларида яна ярқ этиб, муҳим голлар билан жамоага фойда келтиради.
Ҳужумчининг жорий мавсум статистикаси ҳам бошқача гапирмоқда: 22 ўйин — 22 гол ва 2 голли пас.
Гвардиола фикрига кўра, Эрлингнинг соғлом қолиши ва тўлиқ тикланиши клуб учун жуда муҳим. Чунки “Сити”нинг гол машинаси тўлақонли формага қайтса, рақиблар учун яна қўрқинчли кунлар бошланади.
Мухлислар эса энди бир нарсани билади: Холанднинг 100-голи масала эмас — вақт масаласи.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
