Мадриднинг машҳур “Реал” клуби узоқ вақт давомида кўз остидан ўтказиб келган Иброҳим Конатени ўз сафига қўшиш режасидан расман чекинди. Европа гиганти бу қарорга футболчининг сўнгги ойлардаги формадаги тушкунлиги, ўйин амплитудасининг пасайиши ва суперклуб стандартларига жавоб бермай қолаётгани сабаб бўлгани айтилмоқда.
Goal ва The Athletic каби ишончли манбалар ёзишича, мадридликлар бу ҳақда “Ливерпул” раҳбариятини аллақачон хабардор қилган. Бу эса Конатенинг кейинги қадамларига жиддий таъсир кўрсатиши аниқ.
Чунки 26 ёшли франциялик ҳимоячи узоқ вақтдан бери “Сантьяго Бернабеу”ни ўзининг навбатдаги манзили қилиш истагида эди. Шу ниятда у “Ливерпул” билан амалда тугаб бораётган шартномани ҳам узайтиришни ортга суриб келаётганди.
Эндиликда вазият кескин ўзгарди — мерсисайдликлар ҳимоячини сақлаб қолиш учун янги шартнома таклиф этиш имконига эга. Клуб агар тез ҳаракат қилса, Конатени яна узоқ муддатга жамоа бағрида қолдириши мумкин.
Шу билан бирга, футболчининг ўзи учун ҳам бу жиддий сигнал: “Реал”дан воз кечилгани карьерадаги стратегик режаларни қайта кўриб чиқишга мажбур қилади.
Жорий мавсумда Иброҳим Конате барча турнирларда 18 марта майдонга тушиб, 1 та гол урди. Transfermarkt маълумотларига кўра, ҳимоячининг бозор қиймати шу пайтда 55 миллион еврога баҳоланган.
Энди эса барча кўзлар Конатенинг қарорларига қаратилган — у “Ливерпул”да қоладими ёки бошқа вариантларни излайдими, яқин кунларда аниқлик киритилади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
