Англия Премьер-лигасининг 14-тури чиройли голлар ва ҳақиқий драма билан бошланди. «Манчестер Сити» Лондонда меҳмон бўлиб, «Фулҳэм»га қарши ўта жиддий рақобатли ўйинда 5:4 ҳисобида зафар қучди. Ушбу беллашув мухлисларни ҳаяжонга солган воқеалар, юксак темп ва маҳоратли голлар билан эсда қолди.
Учрашувда “шаҳарликлар” ўзини яна бир бор чемпионликка даъвогар эканини кўрсатди. Эрлинг Ҳоланд ўзининг АПЛдаги юбилей — 100-голини урди. Норвегиялик суперҳужумчи яна майдондаги асосий фигуралардан бири бўлди. Фил Фоден эса ўйинда дубль қайд этиб, жамоасига муҳим ҳисса қўшди. Шунингдек, Рейндерс ва Жереми Доку ҳам Лено дарвозасини бир маротаба ишғол этишга муваффақ бўлишди.
“Фулҳэм” ҳам таслим бўлмади — Лондон жамоаси Самуэл Чуквуэзени етакчига айлантирди. Нигериялик футболчи иккита гол урди, унга қўшимча равишда Смит-Роу ва Ивоби ҳам ўз номларини таблога ёздириб қўйишди. Бироқ бу сафар ҳам уй жамоанинг қайтариғи ғалаба учун етарли бўлмади.
Ўзбекистон терма жамоаси ҳимоячиси Абдуқодир Ҳусанов эса навбатдаги турда ҳам асосий таркибдан жой олмади ва ўйинни захирадан кузатишга мажбур бўлди.
Ғалаба «Манчестер Сити»га 28 очко йиғиб, 2-ўриндаги мавқеини янада мустаҳкамлаш имконини берди. «Фулҳэм» эса 17 очко билан 15-поғонада қолмоқда.
АПЛ, 14-тур
Фулҳэм – Манчестер Сити: 4:5
Голлар:
Смит-Роу 45+2, Ивоби 57, Чуквуэзе 72, 78 – Ҳоланд 17, Рейндерс 37, Фоден 44, 48, Доку 54
Фулҳэм: Лено, Тете (Кастан, 46), Андерсен, Бассей, Сессинион, Берг, Лукич (Чуквуэзе, 46), Смит-Роу (Кинг, 78), Уилсон (Кевин, 82), Хименес, Ивоби
Манчестер Сити: Доннарумма, Нунес, Диаш, О’Райли, Гвардиол, Рейндерс (Шерки, 82), Нико (Стоунз, 64), Фоден (Аке, 90+7), Доку (Савино, 64), Силва, Ҳоланд
Огоҳлантириш: Шерки 90+5
Хулоса қилиб айтганда, Лондон кечаси яна бир бор АПЛнинг нега дунёдаги энг қизиқарли чемпионат эканини исботлади — голлар, ҳаяжон, интрига ва юқори савиядаги футбол! “Сити” эса чемпионлик йўлидаги навбатдаги муҳим поғонадан муваффақиятли ўтди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
