Жаҳон чемпионати 2026 қуръаси: Месси ва Роналду кимга қарши ўйнайди?

Жаҳон чемпионати 2026 йилги финал босқичи учун қуръа ташлаш жараёни жума куни, 5-декабр куни бўлиб ўтади. Тадбир АҚШнинг Вашингтон шаҳридаги “Кеннеди маркази”да ўтказилади ва Тошкент вақти билан соат 22:00 да бошланади.

Қуръани реал вақт режимида кузатиш учун LiveResult платформаси матнли трансляция олиб боради. Бу йилги чемпионат тарихда биринчи марта 48та терма жамоа иштирокида ўтказилади.

АҚШ, Канада ва Мексика терма жамоалари мусобақа мезбони сифатида автоматик йўлланмаларга эга бўлишди. Ҳозирга келиб яна 39 жамоа саралаш босқичларида ўз ўрнини таъминлади.

Қолган 6 йўлланма март ойида бўлиб ўтадиган қитъалараро плей-офф ва УЕФА зонаси ўйинлари орқали аниқланади. Жамоалар қуръа учун тўрт саватга бўлинган.

Биринчи саватда мусобақа мезбонлари – АҚШ, Канада ва Мексика жойлашган. Қолган жамоалар ФИФАнинг 2025 йил ноябрь ҳолатидаги рейтингига кўра жойлаштирилган.

Тўртинчи саватнинг ярми ҳали ўз ўрнини таъминламаган жамоалардан иборат. Тўртинчи саватда қуйидагилар бор: - УЕФА йўналиши А ғолиби (Уэлс ёки Босния ва Герцеговина – Италия ёки Шимолий Ирландия); - УЕФА йўналиши B ғолиби (Украина ёки Швеция – Польша ёки Албания); - УЕФА йўналиши C ғолиби (Словакия ёки Косово – Туркия ёки Руминия); - УЕФА йўналиши D ғолиби (Дания ёки Шимолий Македония – Чехия ёки Ирландия); - Қитъалараро йўналиш 1 ғолиби (Янги Каледония ёки Ямайка – Конго ДР); - Қитъалараро йўналиш 2 ғолиби (Боливия ёки Суринам – Ироқ).

Қуръа ташлаш жараёнида гуруҳлар қуйидаги тартибда ташкил этилади. Мезбон давлатларнинг ўрни аллақачон маълум: Мексика А гуруҳида, Канада B гуруҳида, АҚШ эса D гуруҳида ўйнайди.

Жамоалар саватлардан бирин-кетин тортилиб, гуруҳларга жойлаштирилади. ФИФА чемпионат гуруҳларини шакллантиришда қоидаларга риоя қилади: 1) Бир гуруҳда бир хил конфедерацияга мансуб икки ёки ундан ортиқ жамоа бўлмаслиги керак (УЕФА бундан мустасно); 2) Ҳар бир гуруҳда УЕФАдан камида бир ва кўпи билан икки жамоа бўлиши лозим; 3) ФИФА рейтингидаги биринчи ва иккинчи ўринларини эгаллаган Испания ва Аргентина жамоалари турнир тармоғининг турли қисмларига жойлаштирилади, шунингдек, учинчи ва тўртинчи ўрин эгалари Франция ва Англия ҳам шундай тартибда бўлади.

Қуръа натижаларига катта қизиқиш билдирилмоқда. Жаҳон чемпиони Аргентина жамоаси кимларга қарши ўйнаши маълум бўлади.

Шу билан бирга, Португалия жамоаси ва 41 ёшида мундиалда сўнгги марта қатнашадиган Криштиану Роналду ҳам диққат марказида бўлади. Германия жамоаси эса олдинги икки мундиалда гуруҳдан чиқа олмаган эди.

Бу сафар Бундестимг яхши тайёргарлик кўриб, плей-оффга чиқиш ниятида. Тадбирни Англия терма жамоасининг собиқ футболчиси Рио Фердинанд олиб боради.

Унга таниқли бошловчи Саманта Жонсон ва спорт оламининг юлдузлари Том Брейди, Уэйн Грецки, Аарон Джадж ва Шакил ЎНил ёрдам беради. Махсус меҳмон сифатида Эли Меннинг иштирок этиши кутилмоқда.

Жаҳон чемпионати ўйинлари 2026 йил 11-июндан 19-июлгача бўлиб ўтади. Финал учрашуви АҚШнинг “Метлайф” стадионида ўтказилади.

“Zamin”ни Telegram'да ўқинг!