“Барселона”нинг бош мураббийи Ханс-Дитер Флик жамоанинг ёш юлдузи — Ламин Ямалнинг бу мавсумдаги порлоқ ўйини ҳақида самимий ва баланд баҳосини айтиб ўтди. Унга кўра, Ламин нафақат индивидуал маҳорат, балки жамоавий фикрлаш, ҳужум ва ҳимоядаги масъулияти билан ҳам эътиборга лойиқ бўлиб бормоқда.
Флик таъкидлаишича, Ямалнинг “Атлетико”га қарши ўйиндаги ҳаракатлари — айниқса, жойидаги интенсив прессинг ва тўхтовсиз ҳаракати — жамоанинг умумий ритмини кўтариб, рақибни қийин аҳволга солган. Мураббийнинг фикрига кўра, ёш футболчи ҳар бир ўйинда ўз устида ишлаётгани, машғулотларда катта меҳнат қилаётгани ва бу жараён Фликни ҳайратга солаётгани ёқимли ҳол.
“Бугунги машғулотда кўрганларим менга жуда ёқди. Унинг ҳар бир қадамида иштиёқ, ҳар бир ҳаракатида ривожланишга интилиш бор. Ламинни ‘Барселона’да шундай даражада кўриш — мураббий учун катта бахт”, — деган Флик Football Espana нашрига.
Мураббийнинг яна бир эътиборли фикри — Ямалнинг характер хусусиятлари. У ерга қулагани учун пенальти қидирмайдиган, рақибни алдаб ўтгач, тўхтаб қолмайдиган, аксинча ёки пас излайдиган, ёки яна бир футболчини ортда қолдиришни истайдиган жасур ўйинчи сифатида тавсифланди. Бу эса Ямалнинг ёшига нисбатан катта етуклик кўрсатади.
Статистика ҳам ёш ҳужумчининг ўсишини тасдиқлайди: жорий мавсумда у барча мусобақаларда 15 та ўйинда майдонга тушиб, 7 та гол урган ва яна 7 та ассист билан жамоасига ҳисса қўшган. Бу кўрсаткичлар 18 ёшли футболчи учун жуда жиддий даража.
Ламин Ямал катта футболда қадамма-қадам юлдузга айланиб бораётгани аниқ. Фликнинг ишончи ва унга нисбатан билдирган юқори эҳтироми эса мухлислар учун янада катта умид ва қувонч бағишлайди. “Барселона”да янги авлоднинг етакчиси бўлишига ишонч кучаймоқда — мухлислар эса унинг ҳар бир ўйинидан баҳра олишда давом этмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
