2026 йилги Жаҳон чемпионатига қуръа ташланиши миллий футболимиз учун янги тарихий саҳифа очди. Ўзининг илк мундиалига йўл олган Ўзбекистон “K” гуруҳига тушди ва бу ерда уни Португалия ҳамда Колумбия каби кучли рақиблар кутиб турибди. Учинчи жамоа эса март ойида аниқ бўлади — бу Конго Демократик Республикаси, Янги Каледония ёки Ямайкадан бири бўлиши мумкин.
Футбол оламида катта қизиқиш уйғотган қуръадан кейин сунъий интеллект ҳам гуруҳдаги вазиятни таҳлил қилиб, Ўзбекистоннинг плей-оффга чиқиш эҳтимолларини баҳолаб берди. Ушбу баҳолар расмий прогноз бўлмаса-да, вазиятни англашга ёрдам берадиган мухим мезон сифатида кўрилмоқда.
Португалия – гуруҳ етакчиси
Рафаэл Леау, Рубен Диаш, Бруну Фернандеш каби юлдузларга тўла таркиб мундиал учун асосий фаворитлардан ҳисобланади. Ўзбекистон учун бу учрашувда энг муҳим вазифа — йирик ҳисобда мағлубиятдан қочиш. Дуранг эса нафақат сенсация, балки плей-офф учун катта “бонус” бўлади.
Колумбия – беқарор, лекин кучли рақиб
Жисмоний қуввати юқори, техник кўникмалари яхши жамоа. Бироқ уларда баъзан барқарорлик етишмайди. Шу жиҳатдан, Ўзбекистон учун Колумбиядан очко олиш имконияти реал ҳисобланади. Бу ўйин гуруҳ тақдирида ҳал қилувчи аҳамиятга эга бўлиши мумкин.
Конго ДР / Янги Каледония / Ямайка – энг қулай рақиб
Ҳозирча айнан қайси жамоа бизга рақиб бўлиши аниқ эмас. Аммо сунъий интеллект Конго ДРни ҳимоядаги тартибсизликлар сабаб энг “қулай” рақиб деб кўрмоқда. Ўзбекистон бу учрашувда ғалабага мўлжал қўяди.
Гуруҳдан чиқиш формулалари
A-вариант: 2-ўрин учун кураш
Бу йўлнинг асосий шарти — африкан рақибни мағлуб этиш. Колумбияга қарши камида дуранг қайд этилиши лозим. Португалияга қарши йирик ҳисобда мағлубиятга йўл қўйилмаса, 4 очко билан 2-ўрин имконияти жуда юқори бўлади.
B-вариант: энг яхши 3-ўринлар орқали чиқиш
Фабио Каннаваро жамоаси 3–4 очко тўплаб, тўплар нисбатини ижобий ушлаб турса, 3-ўрин орқали ҳам плей-оффга йўл олиши мумкин.
Тахминий имкониятлар:
— 1–2-ўриндан чиқиш эҳтимоли: 20–30%
— 3-ўрин орқали ўтиш эҳтимоли: 15–20%
— Умумий плей-офф имконияти: 35–45%
Хулоса
Ўзбекистон бу гуруҳда мутлақ аутсайдер эмас. Қайта аксинча — таркиби жиддий кучайган, интизоми мустаҳкам, ўз услубига эга жамоа сифатида рақобатга тайёр. Конгога қарши ғалаба, Колумбиядан очко олиш ва Португалияга қарши ўйинда катта ҳисобда мағлуб бўлмаслик орқали Каннаваро шогирдлари ўз тарихидаги илк мундиални плей-офф билан давом эттириши мумкин.
Меҳмон гуруҳидаги фойдаланувчилар ушбу мақолага изоҳ қолдира олмайди.
