«Ливерпуль»нинг ўтган мавсумдаги чемпионлик йўлида ҳал қилувчи ўрин тутган Муҳаммад Салоҳ атрофида вазият яна кескинлашди. Клуб ичида бир неча ойдан бери кузатилаётган инқироз, бош мураббий Арне Слотнинг қарорлари ва Салоҳнинг кўпайган норозилиги жамоа атмосферасини жиддий ўзгартириб юборди.
Мавсум бошидан буён Слот штабининг қарорлари сўнгги турларда айниқса намоён бўлди — Мисрлик юлдуз бир неча учрашувда асосий таркибдан ўрин олмади. Бу қарор Салоҳ учун оғир зарба бўлди ва у буни яширмади.
«Ота-онамга қўнғироқ қилиб, “Брайтон”га қарши ўйинга келишларини айтдим. Ўша куни майдонга тушаманми – бу энди мен учун унча аҳамиятли эмас. Африка Миллатлар кубоги учун терма жамоага кетишимдан олдин «Энфилд»да мухлислар билан хайрлашмоқчиман. Чунки қайтиб келганимда бу ерда нима бўлишини ҳеч ким билмайди», — деди Салоҳ ўзига хос алам билан.
13 декабрь куни бўлиб ўтадиган «Ливерпуль» – «Брайтон» учрашуви (20:00, Тошкент вақти) Салоҳнинг клубдаги кейинги тақдири учун ҳам муҳим белгига айланиши мумкин. Англия матбуоти мураббий ва футболчи ўртасидаги муносабат сўнгги чегарага яқинлашганини таъкидламоқда. Клуб раҳбарияти эса вазиятдан қутулиш йўлини излаётгани айтилмоқда.
Эслатиб ўтамиз, 33 ёшли Муҳаммад Салоҳ ноябрь ойида БААда ўтган халқаро мусобақада Миср терма жамоаси сафида Ўзбекистонга қарши майдонга тушганди. Ўша баҳсда миллий жамоамиз Африка вакилини 2:0 ҳисобида маглуб этган ва кейинроқ финалда Эронни мағлуб этиб, мусобақа чемпионига айланган эди.
Салоҳнинг кейинги қадами, у «Ливерпуль»да қоладими ёки йўқ — бу савол ҳозир нафақат Англия, балки бутун футбол оламини қизиқтириб қўйган. Z-авлодча айтганда: вазият «жуда спойлерли» кетаётгани аниқ — ёки драманинг чўққиси яқин, ёки катта саҳифа алмашади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
