Далич: Англия бизнинг кучли рақибимиз

Хорватия миллий терма жамоаси бош мураббийи Златко Далич 2026-йилги футбол бўйича Жаҳон чемпионати гуруҳ босқичи қуръаси якунлари бўйича фикр билдирди. Хорватия L гуруҳидан ўрин олди ва Англия, Гана ҳамда Панама жамоалари билан беллашади.

"Биринчи саватчадан биз энг кучли жамоалардан бирини, бизнинг эски дўстларимиз — Англияни олдик. Бу менинг мураббийлик давримда уларга қарши бешинчи ўйин бўлади.

Биринчи ўйинимиз айнан уларга қарши бўлиши биз учун бироз ноқулай, чунки у жуда муҳим ва старт учун ҳал қилувчи ўйин. Европа чемпионатида ҳам шундай вазиятда бўлганмиз, у ерда Англияга минимал ҳисобда ютқазган эдик.

Ўтган турнирда эса Испанияга ютқазгандик. Европа чемпионатидаги ўйинларимиз яхши чиқмади, лекин Жаҳон чемпионатларининг бошланиши биз учун муваффақиятли бўлган", — деди Далич Хорватия футбол федерацияси сайтига берган интервьюсида.

"Панама ва Гана — биз яхши ўйин кўрсатиб, ижобий натижага эришишимиз мумкин бўлган рақиблар. Уларини яхшилаб ўрганамиз.

Бизнинг мақсадимиз — гуруҳдан чиқиш эканини биламиз. Сўнгги Жаҳон чемпионатларида катта натижаларга эришганимиздан кейин биздан нимани кутшаётганини тушунамиз.

Аммо ўзимизга ортиқча босим юкламаймиз. Мусобақадан завқланишга ҳаракат қиламиз.

Биз учун энг муҳими — 6 ой ичида футболчиларимиз соғлом ва тўлиқ тайёр бўлиши, жароҳатлар бўлмаслиги." "Биринчи ўйинда Хорватияга қарши ўйнаш Тухел учун ҳам ноқулай. У менга, биз гуруҳдаги эмас, балки чорак финалда учрашишимиз керак эди, деб айтди.

Лекин қуръа шундай бўлди. Ҳамма Хорватиядан қочишни хоҳлайди, чунки биз сўнгги икки Жаҳон чемпионатида мўъжиза яратдик.

Қуръа бўйича яхши томони шундаки, биринчи ўйинни 17-июнда ўтказамиз, яъни уйда яхши тайёргарлик кўриш ва якуний синовлар учун икки та рақиб топишга етарли вақтимиз бор. Ўйнайдиган шаҳарларимиз жуда яхши, айниқса, мухлисларимиз учун қулай.

Энди машғулотлар лагерини танлашимиз, яхши тайёргарлик кўришимиз ва скаутларимизга иш бошлаш имконини беришимиз керак." Айни пайтда Хорватия FIFA рейтингида ўнинчи ўринда бормоқда. “Zamin”ни Telegram'да ўқинг!