«Ливерпул» атрофида кейинги кунларда яна турли баҳс-мунозаралар кучайди. Муҳаммад Салоҳнинг «Лидс» билан учрашувдан сўнг билдирган шов-шувли фикрларидан кейин клуб раҳбариятининг позицияси барча мухлислар учун қизиқ мавзуга айланди. Мерсисайдликлар раҳбарияти эса вазиятга аниқ ёндашиб, бош мураббий Арне Слотга тўлиқ ишонч билдиришда давом этмоқда.
Маълумотларга кўра, журналист Бен Жейкобс тарқатган хабарда Слотнинг клубдаги мавқеи мутлақ хавф остида эмаслиги, аксинча, раҳбарият унинг иш услубини қўллаб-қувватлаётгани қайд этилган. Салоҳнинг кескин баёноти эса мухлислар орасида турли реакцияларга сабаб бўлди.
Эслатиб ўтамиз, 33 ёшли вингер «Лидс»га қарши 3:3 ҳисобидаги ўйинда захирада қолдирилгани борасида қаттиқ норозилик билдириб, клубни айблаган эди:
«Мен жамоа учун йиллар давомида боримни бердим, аммо мени автобус остига ташлашяпти. Африка Кубогига кетаман — қайтиб келганимда нима бўлишини билмайман», — деганди у ўша учрашувдан кейин.
Айни пайтда клуб раҳбарияти Салоҳнинг келаси ўйинларда иштирок этиш-этмаслиги, хусусан, Африка Кубоги 21 декабрда старт олишидан олдин жамоага фойда келтира олиши ёки йўқлигини муҳокама қилмоқда. Унинг қисқа муддатдаги ҳолати ва руҳий тайёргарлиги ҳам ҳисобга олинади.
«Ливерпул» ичидаги бу вазият мухлислар учун янги драмани эслатмоқда. Бир томонда жамоанинг тасдиқланган стратеги Слот, иккинчи томонда клубнинг асосий юлдузларидан бири — Салоҳ. Қандай бўлмасин, бу жараён клубдаги ички муҳит ва кейинги ўйинларга ҳам таъсир қилиши табиий.
Мерсисайдликларни олдинда муҳим учрашувлар кутмоқда ва жамоанинг ички барқарорлиги ушбу босқичда катта аҳамиятга эга бўлади. Тактикасини йўқотмаслик ва яхши формада қолиш эса асосий вазифа бўлиб турибди.
“Zamin”ни Telegram'да ўқинг!
