«Интер Майами»нинг жаҳон футболи рамзига айланган ҳужумчиси Лионель Месси яна бир бор АҚШ чемпионатида ўз сўзини айтди. У кетма-кет иккинчи мавсумда МЛСнинг «Йилнинг энг яхши ўйинчиси» нуфузли мукофотига лойиқ топилди. Лига расмий сайти бу янгиликни эълон қилар экан, аргентиналик юлдузнинг янги тарихий натижаларини алоҳида қайд этди.
Энг қизиғи, Месси бу мукофотни бирин-кетин иккинчи бор қўлга киритган МЛС тарихидаги илк футболчи сифатида ёзувга тушди. Унинг ўтган мавсумдаги фантастик кўрсаткичлари бунга муносиб бўлди: 49 та учрашувда 43 та гол, 26 та аниқ ассист ва рақиб дарвозасига доимий хавф солиб турган ўйин услуби.
Шунингдек, Месси кетма-кет икки мавсум давомида камида 36 тадан гол урган ягона футболчи сифатида ҳам янги тарих ёзди. Плей-офф босқичида эса унинг иштирокида яна 15 та гол қайд этилди — бу ҳам лигадаги мутлақ рекорд сифатида қайд этилмоқда.
Якунланган мавсумда Месси фақат шахсий статистика билан чекланиб қолмади. У «Интер Майами»нинг МЛС кубогини қўлга киритишига ҳам катта ҳисса қўшди. Жамоа унинг етакчилигида янги даражага кўтарилди ва мухлислар учун эсдан чиқмас мавсум тақдим этди.
Дунё футболида ёши катталигига қарамасдан, Месси қилаётган иши билан ҳали ҳам замонавий футболнинг энг асосий юзи эканини исботлаб келмоқда. МЛСда эришилаётган бундай натижалар эса унинг шиддати ҳали ҳам сўнмаганини кўрсатмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
