Европа футболида “Манчестер Юнайтед”, “Эвертон”, “Манчестер Сити”, “Саутгемптон”, “Рейнжерс” ва “Фиорентина” каби йирик клублар шарафини ҳимоя қилган, кейинчалик мураббийлик фаолиятида икки бор “Навбаҳор”ни бошқарган россиялик мутахассис Андрей Канчельскис ўзбек футболи ҳақида фикр билдириб, жамоатчиликнинг эътиборини ўзига қаратди.
Унинг таъкидлашича, Ўзбекистон футболи йил сайин шиддат билан ривожланиб, глобал миқёсда ўз ўрнини мустаҳкамлаб бормоқда. “Ўзбекистон миллий терма жамоасининг жаҳон чемпионатига чиқиши тасодиф эмас. Улар тизимли ишлаётган, тарбияланаётган авлод кучли ва интизомли,” — деди Канчельскис.
Россия клубларини Осиё бозорига эътибор қаратмасликда айблаган мутахассис қуйидагиларни қўшимча қилди:
“Бизга яқин, дўстона муносабатдаги ҳудудда кўплаб талантли футболчилар бор. Россия клублари ўзбек футболчиларига жиддий қарай бошлаши керак.”
Абдуқодир Ҳусанов — ўзбек футболининг янги юзи
Бугунги кунда ўзбек футболи ҳақида гап кетганда биринчи тилга олинаётган исм — Абдуқодир Ҳусанов. 21 ёшли ҳимоячи “Бунёдкор” тизимида шаклланган, кейин Беларуснинг “Энергетик-БГУ” клубида профессионал фаолиятини бошлаган.
Эътиборлиси, у ҳозирги кунда Франция ва Англия чемпионатларида майдонга тушган биринчи ва ягона ўзбек футболчиси сифатида тарихга кирган. Transfermarkt экспертлари ҳам Абдуқодирнинг бағрикенг салоҳиятини эътироф этиб, уни 35 миллион еврога баҳолаган — бу эса уни Марказий Осиёдаги энг қимматбаҳо ўйинчига айлантиради.
Тарихий йўлланма ва ўзбек легионерлари авлоди
Ўзбекистон миллий терма жамоасининг илк бор жаҳон чемпионатига йўл олиши – футболимизда янги давр бошланишининг энг ёрқин далили. Бу жараёнда фақат Ҳусанов эмас, балки кўплаб легионерлар ҳам ўз ҳиссасини қўшмоқда.
Италия А Сериясида “Женоа”, “Специя”, “Кальяри” ва “Рома” каби клубларда тўп сурган Элдор Шомуродов бу мавсум Туркиянинг “Истанбул Башакшеҳир” жамоасига қўшилди ва янги саҳифа очди.
Россия кубоги ва Суперкубоги соҳибини аниқлашда муҳим рол ўйнаган Аббосбек Файзуллаев ҳам айни пайтда “Башакшеҳир”да ўзининг илк голини урди. Ҳусниддин Алиқулов эса Туркиянинг “Ризеспор” клубида бир неча йилдирки асосий таркибда ўйнаб келмоқда.
Осиё ва араб давлатларидаги ўзбек легионерлари
Эрон чемпионатида Рустам Ашурматов, Одилжон Ҳамробеков, Жалолиддин Машарипов, Остон Ўрунов ва Ўткир Юсупов каби футболчиларимиз ўз номини мустаҳкамлаб улгурган.
Араб мамлакатларида эса Отабек Шукуров, Абдулла Абдуллаев, Азиз Ғаниев ва Акмал Мозговойлар юртимиз шарафини муносиб ҳимоя қилмоқда.
Хулоса ўрнида айтиш мумкинки, Андрей Канчельскис таъкидлаганидек, ўзбек футболи ҳозирги кунда жаҳон футбол харитасида тобора муҳим ўрин эгаллаб бормоқда. Юртимиздаги янги авлод легионерлари — бунга ёрқин исбот.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
