Мадриднинг «Реал» клубида навбатдаги жиддий қарор арафасида турибди. Манбаларга кўра, жамоа бош мураббийи Хаби Алонсо бугун, 14 декабрь куни истеъфога чиқарилиши мумкин. Испаниялик мутахассиснинг келажаги тўлиқ равишда «Алавес»га қарши ўтказиладиган учрашув натижасига боғлаб қўйилган.
Маълумотларга қараганда, «қаймоқранглилар» раҳбарияти Алонсо фаолиятига нисбатан кескин муносабатда. Агар «Реал» навбатдаги турда «Алавес»ни мағлуб этишга қодир бўлмаса, клуб бош мураббий билан хайрлашиши эҳтимоли жуда юқори. Бундай ҳолатда қарор зудлик билан қабул қилиниши айтилмоқда.
Хабарларга кўра, эҳтимолий истеъфодан кейин жамоани вақтинча бошқариш вазифаси «Реал» ёшлар жамоасини бошқараётган Альваро Арбелоага топширилади. Клуб раҳбарлари уни ички вариант сифатида кўриб чиқмоқда ва у жамоа муҳитини яхши биладиган мутахассис сифатида баҳоланяпти.
Аввалроқ эса мадридликлар катта тажрибага эга мураббий – Юрген Клопп номзодига қизиқиш билдиргани ҳақида хабарлар тарқалган эди. Бу эса «Реал» раҳбарияти келгуси мавсумлар учун жиддий режалар қилаётганидан далолат беради.
Қисқаси, бугунги баҳс нафақат турнир жадвали учун, балки Хаби Алонсо тақдири учун ҳам ҳал қилувчи аҳамият касб этади. Мадрид мухлислари эса жамоадан фақат ғалаба кутишмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
