“Реал Мадрид” бош мураббийи Хаби Алонсо учун энди хато қилиш имконияти деярли қолмади. Жамоа якшанба куни Ла Лиганинг 16-тури доирасида сафарда “Алавес”ни 2:1 ҳисобида мағлуб этди. Бу ғалаба вақтинча бўлса-да, мадридликлар атрофидаги кескинликни бироз пасайтирди.
“The Athletic” нашрининг ёзишича, мазкур натижа 44 ёшли баск мутахассисига нисбатан босимни камайтирган, аммо клуб ичида — турли даражаларда, жумладан раҳбарият қатламида ҳам — Хаби Алонсо лойиҳасига оид саволлар ҳали ҳам очиқ қолмоқда. Айни пайтда “Реал”да сабр ҳаддан зиёд эмас, айниқса натижалар талабга жавоб бермаса.
Энди навбатда янада хавфли синов турибди. Чоршанба куни “Реал” Испания Кубогининг 1/16 финалида сафарда учинчи дивизион аутсайдери “Талавера”га қарши майдонга тушади. Қоғозда бу учрашув мадридликлар учун осон кўриниши мумкин, аммо айнан шундай ўйинлар кўпинча энг оғриқли сюрпризларга сабаб бўлади.
Манбаларга кўра, ушбу баҳсдаги эҳтимолий омадсизлик клубда фалокат сифатида қабул қилинади. Бундай ҳолатда раҳбарият томонидан жиддий ва тезкор қарорлар қабул қилиниши мумкин. Шу сабабли “Талавера”га қарши ўйин Хаби Алонсо учун навбатдаги оддий баҳс эмас, балки ишонч кредити текшириладиган синовдир.
Шу билан бирга, “Реал Мадрид” ҳозирча натижалар йўл қўяётгани сабаб Алонсони бош мураббий лавозимида сақлаб қолиш тарафдори. Аммо бу ишонч шартли: жамоа барқарор ғалабалар сериясини давом эттирмаса, вазият кескин ўзгариши мумкин. Амалда эса Хаби Алонсо учун “иккинчи имконият” деган тушунча қолмаяпти.
Қисқаси, “Реал” устозининг олдида жуда нозик давр турибди. Ҳар бир ўйин, ҳар бир қарор ва ҳар бир натижа унинг келажагини белгилаб беради. Мадридда эса, одатдагидек, вақт ҳам, сабр ҳам жуда қиммат.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
