“Кристал Пэлас”нинг марказий ҳимоячиси Марк Гехи ёзги трансфер бозори олдидан Европа грандлари эътиборига тушди. Айниқса, “Манчестер Сити” уни ўзининг асосий трансфер мақсадларидан бири сифатида белгилаб олгани ҳақида хабарлар тобора кучаймоқда. 25 ёшли Англия терма жамоаси футболчисининг келажаги эса ҳозирданоқ қизғин муҳокама марказида.
Маълумотларга кўра, Гехи ўтган ёзда “Ливерпуль”га ўтиши мумкин эди, аммо бу трансфер турли сабабларга кўра амалга ошмади. Шу воқеалардан кейин ҳимоячи 2026 йилнинг 30 июнига қадар амал қилувчи шартномасини узайтирмасликка қарор қилди. Бу эса унинг “Кристал Пэлас”ни шартнома муддати тугагач, эркин агент сифатида тарк этиши мумкинлигини англатади.
“The Times” нашри ёзишича, “Манчестер Сити” скаутлари Гехининг ўйинини сўнгги бир неча мавсум давомида мунтазам равишда кузатиб келган. Пеп Гвардиола жамоаси ёзда ҳимоя чизиғини жиддий равишда янгилашни режалаштираётган бир пайтда, Марк Гехи айнан шу лойиҳа учун энг мос номзод сифатида қаралмоқда. Универсал, жисмоний жиҳатдан барқарор ва тактик жиҳатдан саводли ҳимоячи “Сити” услубига мос тушиши шубҳасиз.
Айни пайтда “Манчестер Сити” ҳимоясида бир қатор саволлар мавжуд. Жон Стоунзнинг шартномаси ёзгача мўлжалланган бўлиб, агар у спорт формасини тиклаб, барқарор ўйин намойиш этса, клуб томонидан янги келишув таклиф қилиниши мумкин. Натан Аке эса бу мавсумда Премьер-лигада атиги битта ўйинни асосий таркибда бошлаган. Мануэль Аканжи ҳозирда “Интер”да ижарада тўп суряпти. Ҳар икки 30 ёшли ҳимоячининг ёзда “шаҳарликлар” билан хайрлашиши эҳтимоли юқори баҳоланмоқда.
Ана шу вазиятда Марк Гехининг трансфери Пеп Гвардиола учун деярли идеал ечим сифатида кўрилмоқда. Ёш, тажрибали ва ҳали ўсиш имкониятига эга футболчи жамоанинг узоқ муддатли режаларига тўлиқ мос келади. Бироқ “Кристал Пэлас” ҳам вақтни чўзиб ўтирмоқчи эмас. Лондон клуби ўйинчини текин қўйиб юбормаслик учун уни қишки трансфер ойнасидаёқ сотишга тайёр.
Қизиғи шундаки, Гехига бўлган қизиқиш фақат “Манчестер Сити” билан чекланиб қолмаяпти. Бир нечта АПЛ клублари ва Европа жамоалари ҳам ҳимоячининг вазиятини диққат билан кузатиб турибди. Демак, ёз яқинлашган сари Марк Гехи атрофидаги трансфер кураши янада қизийди. Мухлислар учун эса бу навбатдаги катта интрига — “Сити” ҳимояси янги етакчини қўлга кирита оладими ёки йўқ, буни вақт кўрсатади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
