Мадриднинг «Реал» жамоаси бош мураббийи Хаби Алонсо Испания Кубоги 1/16 финали доирасида қуйи лига вакили «Талавера» устидан қийинчилик билан қўлга киритилган 3:2 ҳисобидаги ғалабадан сўнг ўйин ҳақида батафсил фикр билдирди. Мутахассиснинг таъкидлашича, кубок баҳсларида бундай сценарийлар тез-тез учраб туради ва бу сафар ҳам «қаймоқранглар» учун осон кечмаган.
Алонсо биринчи навбатда ўйин давомида юзага келган беқарорликка эътибор қаратди. Унинг сўзларига кўра, ҳисоб 3:1 бўлган пайтда ҳам жамоа эҳтиёткорликни йўқотиб қўйган, натижада фол ишланган ва рақиб яна битта тўп киритиб, босимни кучайтирган. Шу тариқа «Талавера» ўйинга қайта кириб, охирги дақиқаларда интрига сақланиб қолган.
— Кубок ўйинларида бундай ҳолатлар кўп кузатилади. Мен бунга аввал ҳам дуч келганман, бу бошқа жамоаларда ҳам бўлади. Биринчи бўлимда ўйинни тўлиқ назорат қилдик, ҳатто ҳисобни 3:0 га етказиш имкониятлари ҳам бор эди, аммо улардан фойдалана олмадик. Шу сабаб интрига охиригача сақланиб қолди, — деди Алонсо.
Шу билан бирга, у учрашувни томошабоп ва жонли ўтганини алоҳида қайд этди. Мураббийнинг фикрича, энг асосийси — вазифа бажарилди ва жамоа кейинги босқичга йўл олди. Энди эса бутун эътибор навбатдаги учрашувларга қаратилади.
Алонсо Килиан Мбаппенинг ўйинига ҳам тўхталиб ўтди. Франциялик ҳужумчи ушбу баҳсда ҳал қилувчи рол ўйнаб, дубль муаллифига айланди.
— Мбаппе голлари билан ўйин тақдирини ҳал қилди. Унга гол уриш ҳар доим осон бўлган, бу унинг энг кучли жиҳатларидан бири, — дея таъкидлади «Реал» устози.
Натижа борасида эса Хаби Алонсо жамоанинг асосий мақсади фақат ғалаба эмас, балки доимий ривожланиш эканини билдирди. Унинг айтишича, «Реал» бу йўлда аллақачон олдинга қадам ташлаган, аммо барқарорлик ва уйғунлик устида яна ишлаш керак.
— Биз етарлича етук ҳаракат қилишимиз, ўйин осон кечади, деган фикрдан йироқ бўлишимиз шарт. Олдинда муҳим баҳслар бор. Энди барча диққат «Севилья»га қарши ўйинга қаратилган. Йилни яхши якунлаш учун бизга уч очко жуда зарур. Кейин қисқа танаффус қилиб, камчиликлар устида ишлашни давом эттирамиз, — дея хулоса қилди Алонсо.
Шу тариқа, «Реал» қийин синовдан ўтди, аммо кубок баҳсларидаги бундай ўйинлар жамоа учун келгуси катта мақсадлар сари муҳим тажриба бўлиб хизмат қилаётгани аниқ.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
