Англия лига кубогининг чорак финал босқичида «Манчестер Сити» ўз майдонида «Брентфорд» жамоасини қабул қилиб, ишончли ғалабани қўлга киритди. Райан Шерки ва Савионинг аниқ зарбалари «шаҳарликлар»га 2:0 ҳисобидаги муваффақиятни ҳамда мусобақанинг ярим финал йўлланмасини тақдим этди.
Ушбу баҳсда бош мураббий Хосеп Гвардиола таркибда ротация амалга ошириб, захирада қолаётган ўйинчиларга имконият берди. Ҳамюртимиз Абдуқодир Ҳусанов учрашувни асосий таркибда бошлаб, майдонда тўлиқ ҳаракат қилди. Гарчи легионеримиз 16-дақиқада рақибга нисбатан қўполлик ишлатиб, сариқ карточка олган бўлса-да, унинг умумий ўйини мутахассислар томонидан ижобий баҳоланди.
«Манчестер Сити» футболчиларининг ўйинига берилган баҳолар
Нуфузли cityxtra.co.uk нашри экспертлари жамоа аъзоларининг ҳаракатларини қуйидагича таҳлил қилишди:
Дарвоза ва ҳимоя чизиғи
Жеймс Траффорд — 6,5: Ҳар томонлама ишончли ҳаракат. Унинг аниқ паслари ва дарвоза сари йўлланган учта хавфли зарбани қайтариши «Сити» сафидаги энг хотиржам ўйинларидан бирини таъминлади.
Рико Льюис — 6,5: Алоҳида ажралиб турмаган бўлса-да, барқарор ўйин кўрсатди. Майдон марказида ва қанотларда берилган вазифаларни интизом билан бажарди.
Абдуқодир Ҳусанов — 7: Асосий таркибга қайтган ўзбек ҳимоячиси ўйин бошида бироз ҳаяжонланган бўлса-да, иккинчи бўлимда ўзининг устунлигини тўлиқ намойиш этди. 16-дақиқадаги вазиятда майдондан четлатилмагани унинг омади бўлди, аммо кейинчалик хатосиз ўйнади.
Натан Аке — 6: Ҳусановнинг сариқ карточка олишига сабаб бўлган вазиятда тўп йўқотилишининг олдини олиши мумкин эди. Кейинчалик деярли хатога йўл қўймади.
Нико О’Рейли — 7: 20 ёшли иқтидор соҳибидан яна бир ажойиб ўйин. 66 дақиқа ичида майдонда энг кўп тўпга тегиниш бўйича етакчи бўлди ва жамоа учун муҳим фигура эканини исботлади.
Ярим ҳимоя ва ҳужум
Нико Гонсалес — 7: Марказда устунликни таъминлади. 66 дақиқа ичида 56 та пас бериб, майдондаги энг фаол ўйинчи бўлди.
Тижани Рейндерс — 6,5: Голландиялик футболчи «Сити» либосидаги илк қадамларини ишончли ташлади ва голли узатма муаллифига айланди.
Райан Шерки — 8: Учрашув қаҳрамони! Унинг финтлари ва "Брентфорд" ҳимоясига солган доимий хавфи таҳсинга лойиқ. Урган голи эса ҳақиқий шедевр бўлди.
Савиньо — 7,5: Бразилиялик футболчининг жорий мавсумдаги энг ёрқин ўйини. 4 та зарба ва 7 та муваффақиятли дриблинг билан ҳужумда катта куч бўлди.
Мукаса — 5,5: Ҳужумда ҳаракат қилди, бироқ ўйинга жиддий таъсир ўтказа олмади. Бу унинг учун тажриба тўплаш мактаби бўлди.
Оскар Бобб — 5: Жароҳат сабаб атиги 17 дақиқа ўйнади. Унинг эрта майдонни тарк этгани ачинарли ҳол.
Захирадан тушганлар
Фил Фоден — 6,5: Ўз даражасида ўйнади, дарвозабоннинг маҳорати сабаб гол ура олмади.
Матеуш Нуньеш — 6: Ўйин тизгинини ушлаб туришда ёрдам берди.
Бернарду Силва — 6: Сўнгги 25 дақиқада сардорлик вазифасини бажариб, хотиржамлик олиб кирди.
Йошко Гвардиол — 6: Ҳимояда ишончли ҳаракат қилиб, чап қанотни ёпди.
Энди «Манчестер Сити» турнирнинг ярим финалида «Ньюкасл» жамоасига қарши баҳс олиб боради. Мухлислар ушбу баҳсда ҳам Абдуқодир Ҳусановни асосий таркибда кўришга умид қилмоқдалар.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
