Испания чемпионатининг 17-тури доирасида "Реал" ўз майдонида "Севиля" жамоасини қабул қилди ва ишончли ўйин намойиш этиб, 2:0 ҳисобида ғалаба қозонди. «Сантьяго Бернабеу»да бўлиб ўтган беллашувда мезбонларнинг устунлиги тўлиқ сезилиб турди.
Учрашувнинг биринчи бўлимида мадридликлар босимни кучайтириб, 38-дақиқада ҳисобни очишга эришди. Ҳужумни аниқ зарба билан якунлаган Жуд Беллингҳем жамоасига муҳим устунлик олиб келди. Иккинчи таймда ҳам «қаймоқранглилар» ўйин назоратини қўлдан бермади.
Беллашув охирида, 86-дақиқада пенальти нуқтасидан Килиан Мбаппе аниқ зарба йўллаб, ғалабани мустаҳкамлади. Ушбу гол франциялик юлдуз учун алоҳида аҳамиятга эга бўлди: Мбаппе «Реал» сафида бир календар йилида 59 та гол уриб, Криштиану Роналдунинг 2013 йилда ўрнатган клуб рекордини такрорлади.
Бу натижадан сўнг «Реал» очколари сонини 42 тага етказиб, пешқадам Барселона (43 очко) билан орасидаги фарқни минимал даражага туширди. Чемпионлик пойгаси янада қизиқ тус олмоқда.
Меҳмонлар — «Севиля» эса 68-дақиқада Марканнинг четлатилишидан сўнг ўйинни камчиликда давом эттирди. Шунга қарамай, андалусияликлар қаршилик кўрсатишга ҳаракат қилди, аммо натижани ўзгартиришга кучлари етмади. Жамоа 20 очко билан турнир жадвалида 9-поғонада қолиб кетди.
Қисқача айтганда, «Реал» навбатдаги муҳим ғалабани қўлга киритди, Мбаппе эса яна бир бор тарих саҳифаларига номини ёзиб қўйди. Чемпионлик учун кураш эса энди янада қизғин давом этади.
Реал — Севиля 2:0
20 декабр, «Бернабеу»
Голлар: Беллингҳем (38), Мбаппе (86, пеналти).
Реал — Куртуа, Асенсио (Хименес, 90+3), Рюдигер, Ҳейсен, Фран Гарсия, Чуамени, Гулер (Камавинга, 72), Беллингҳем, Винисиус (Гонсало Гарсия, 83), Родриго, Мбаппе.
Севиля — Влаходимос, Хуанлу Санчес, Кармона (Салас, 84), Гудел, Маркан, Суазо (Осо, 60), Агуме (Янузай, 84), Соу, Менди (Гонсалес, 84), Ромеро (Пеке, 70), Алексис Санчес.
Огоҳлантиришлар: Кармона (34), Маркан (37), Родриго (41), Асенсио (60), Агуме (70), Соу (90+2).
Четлатиш: Маркан (68).
Меҳмон гуруҳидаги фойдаланувчилар ушбу мақолага изоҳ қолдира олмайди.
