Мадриднинг машҳур клуби — "Реал" атрофида яна қизиқарли миш-мишлар пайдо бўлди. Испаниянинг Sport.es нашри тарқатган маълумотларга кўра, Карло Анчелоттининг ўғли Давиде Анчелотти яқин келажакда «қироллик клуби» бош мураббийи этиб тайинланиши мумкин.
Манбада таъкидланишича, Давиде Анчелоттининг Бразилиянинг "Ботафого" клубини тарк этиши Мадридда юзага келаётган ички ўзгаришлар билан боғлиқ. Хусусан, «Реал»да иш олиб бораётган Хаби Алонсонинг келажаги савол остида қолмоқда. Айрим манбаларга кўра, испаниялик мутахассис жамоада ўз футбол фалсафасини тўлиқ жорий эта олмаган ва бу раҳбариятни янги вариантлар ҳақида ўйлашга мажбур қилмоқда.
Қайд этилишича, Давиде Анчелотти 18 декабрь куни «Ботафого» билан расман хайрлашган. У 2025 йил июль ойидан бери жамоани бошқариб келаётган бўлиб, қисқа вақт ичида муайян тажриба тўплашга улгурди. У билан бирга жисмоний тайёргарлик бўйича мураббий Лука Герра, шунингдек ёрдамчилар Луис Тевенет ва Эндрю Манган ҳам клубни тарк этди.
Мутахассислар фикрича, Давиде Анчелоттининг Мадридга қайтиши — бу фақат ота-ўғил омили эмас, балки тактик ва стратегик нуқтаи назардан ҳам қизиқ вариант. У Карло Анчелотти қўл остида йиллар давомида ишлаб, юқори савиядаги футбол муҳитини яхши ўзлаштирган.
Ҳозирча бу масала расмий тасдиқланмаган. Бироқ «Реал»да бош мураббийлик лавозими атрофидаги ҳаракатлар яқин ойларда клуб ҳаётида жиддий ўзгаришлар бўлишидан дарак бераётгандек. Мухлислар эса бу сценарий қандай якун топишини катта қизиқиш билан кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
