Мюнхеннинг «Бавария» клуби ҳужумчиси Харри Кейн Германия чемпионатида навбатдаги ёрқин натижа қайд этди. Бундеслиганинг 15-тури доирасида «Хайденхайм»га қарши ўйинда гол урган англиялик форвард тарихий рекорд соҳиби бўлди.
Ушбу баҳсдаги гол орқали Кейн Бундеслигада гол + голли узатма тизими бўйича 100 очколик маррага етиб келди. Эътиборли жиҳати шундаки, бу натижага эришиш учун 32 ёшли ҳужумчига атиги 78 та учрашув кифоя қилди. Бу эса 2004/05 йилги мавсумдан бери расмий статистика юритила бошланганидан буён энг тезкор кўрсаткич сифатида қайд этилди.
Аввалги рекорд нидерландиялик юлдуз Арьен Роббенга тегишли бўлиб, у 100 очколик чегарани 100 та ўйинда ортда қолдирган эди. Харри Кейн эса бу натижани анча қисқа муддатда янгилаб, Бундеслига тарихига ўз номини олтин ҳарфлар билан ёздирди.
Маълумот ўрнида, Кейн 2023 йил ёзида «Тоттенҳэм»дан «Бавария» сафига кўчиб ўтган эди. Қисқа вақт ичида у жамоанинг асосий етакчиларидан бирига айланиб улгурди.
Жорий мавсумда англиялик страйкер Бундеслигада 15 та учрашувда иштирок этиб, 19 та гол уриб ва 3 та голли узатмани амалга оширди. Шунингдек, Европа Чемпионлар лигасида ҳам юқори самарадорлик намойиш этиб, 6 та ўйинда 5 та гол муаллифи бўлди.
Харри Кейннинг бу формаси «Бавария»нинг чемпионлик йўлидаги асосий қуролларидан бири бўлиб қолмоқда. Мюнхенлик мухлислар эса унинг янги рекордлари ҳали олдинда эканига ишонч билан қарамоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
