Элит Осиё Чемпионлар лигасининг 6-тури доирасида бўлиб ўтадиган Ал Иттиҳод – Насаф беллашуви ўтказиладиган майдон ўзгартирилди. Бу ҳақда Саудия Арабистони клуби расмий баёнот билан маълум қилди.
Дастлаб Жидда шаҳридаги шаҳзода Абдуллоҳ ал-Файсал стадионида ўтказилиши режалаштирилган баҳс эндиликда шу шаҳарда жойлашган замонавий «Қирол Абдуллоҳ Ал-Инмаа» стадионида бўлиб ўтади. Қарор ташкилий сабабларга кўра қабул қилингани таъкидланмоқда.
Гуруҳ босқичи доирасидаги ушбу учрашув 23 декабрь куни Тошкент вақти билан соат 23:15 да старт олади. Саудияликлар ўз уйида муҳим очколар учун кураш олиб боришни режалаштирган.
Айни пайтда «Ал Иттиҳод» Элит Осиё Чемпионлар лигаси жадвалида 6 очко жамғарган ҳолда 8-ўринни эгаллаб турибди. «Насаф» эса ҳозирча очко қўлга кирита олмаган ва гуруҳнинг қуйи поғонасида жойлашган.
Қайд этиш жоиз, саудиялик клуб маҳаллий мусобақалардаги танаффусдан унумли фойдаланган. Жамоа БААнинг Дубай шаҳрида ўқув-машғулот йиғини ўтказиб, икки ўртоқлик учрашувида ишончли ғалабалар қайд этди. Илк баҳсда «Палм Сити» 6:0 ҳисобида мағлуб этилган бўлса, иккинчи ўйинда «Галф Юнайтед» устидан 5:0 ҳисобида зафар қучилди.
Бу ҳолат «Ал Иттиҳод»нинг «Насаф»га қарши ўйинга юқори руҳ ва яхши тайёргарлик билан чиқишини кўрсатади. Мухлисларни эса қизиқарли ва кескин баҳс кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
