Жаҳоннинг энг кучли шахматчиси Магнус Карлсен рапид ва блиц мусобақалари олдидан берилган интервьюсида қисқа форматли баҳсларнинг ўзига хос жиҳатлари, фаворитларни аниқлаш қийинлиги ва ёш шахматчилардан кутилган ҳамда кутилмаган натижалар ҳақида очиқ фикр билдирди.
Карлсеннинг таъкидлашича, рапид мусобақалари жуда тезкор ва айрим ҳолларда омадга боғлиқ формат ҳисобланади. Шу сабабли унда аниқ етакчиларни белгилаш осон эмас. Айниқса, айрим етакчи шахматчилар иштирок этмаётган пайтда, турнир деярли лотереяни эслатади. У ўзини ҳисобга олмаган ҳолда ҳам рапидда фаворитлар қатори жуда кенг эканини қайд этди. Шу билан бирга, у блиц форматини ўзи учун нисбатан қулай деб ҳисоблашини яширмади, чунки раундлар сони кўп бўлади ва бу барқарор ўйин кўрсатишга имкон яратади.
Ёш шахматчилар ҳақида гапирар экан, Магнус сўнгги пайтларда барқарор ва ишончли ўйин намоён этаётган Синдаровни алоҳида тилга олди. Унинг фикрича, мазкур ёш гроссмейстер кутилмаган даражада юқори натижа кўрсатиши мумкин. Шунингдек, Гукеш ҳам ташқи томондан фаворитдек кўринмасада, яхши турнир ўтказиш салоҳиятига эга ўйинчилар қаторида қайд этилди.
Блиц мусобақаси ҳақида сўз юритар экан, Карлсен одатда бу форматда Ҳикару ва Алиреза етакчи ҳисобланишини тан олди. Бироқ улар иштирок этмаган шароитда, кўп раундли турнирда ким ажралиб чиқишини олдиндан айтиш деярли имконсизлигини таъкидлади. Унинг фикрича, айнан блицда аниқ фаворитлар йўқ.
Шу билан бирга, Карлсен эҳтимолий сюрпризларга ҳам ишора қилди. У Дубовни блицда кучли номзодлардан бири деб ҳисоблашини, шунингдек, Ниҳал каби шахматчилар ҳам кутилмаган натижа билан мухлисларни ҳайратга солиши мумкинлигини айтди.
Қисқаси, жаҳон чемпионининг фикрлари шуни кўрсатадики, олдиндаги рапид ва блиц мусобақаларида кураш жуда кескин кечади. Фаворитлардан ташқари, ёш ва кам тажрибали ўйинчилар ҳам ўз сўзини айтиши мумкин. Бу эса мухлислар учун янада қизиқарли ва интригага бой турнирларни ваъда қилмоқда.
Меҳмон гуруҳидаги фойдаланувчилар ушбу мақолага изоҳ қолдира олмайди.
