«Манчестер Юнайтед» бош мураббийи Рубен Аморим АПЛ доирасида «Вулверхэмптон»га қарши ўйиндан кейин жамоанинг ўйинини очиқ ва танқидий баҳолади. Португалиялик мутахассиснинг таъкидлашича, учрашув давомида манкунианлар керакли даражада ўйинни назорат қила олмаган.
Аморимга кўра, жамоада ижодий ечимлар ва аниқ ҳаракатлар етишмади. Унинг айтишича, майдонда салбий руҳ сезилган, бу эса ҳужумда ҳам, умумий ўйинда ҳам ўз аксини топган. Бош мураббий учрашувни фаол бошлаш учун илк дақиқаларданоқ уч нафар ҳужумчи билан ҳаракат қилишга уринганини, аммо бу режа кутилган самарани бермаганини таъкидлади.
«Биз қийналдик, аниқлик ҳам, ижодкорлик ҳам кам бўлди. Бугун шунчаки бизнинг кунимиз эмас эди. Натижадан, албатта, кўнглимиз тўлмади, лекин ўтмишни ўзгартириб бўлмайди. Энди олдинга қараб, кейинги ўйинларга тайёрланиш керак», — деди Аморим.
Ушбу натижадан кейин «Манчестер Юнайтед» Англия Премер-лигаси турнир жадвалида 30 очко билан олтинчи ўринда қолмоқда. Жамоани олдинда яна қатор муҳим баҳслар кутиб турибди ва Аморим уларда хатолардан хулоса чиқаришга умид қилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
