Корнеев «Лечче»нинг «Ювентус» билан дурангини мўъжиза деди

ЦСКА собиқ ярим ҳимоячиси Игорь Корнеев «Ювентус»нинг Лучано Спаллетти қўл остидаги ўйинидан олган таассуротлари билан ўртоқлашди. Бу ҳақда euro-football.ru хабар беради.

Спаллетти мавсум давомида, Игорь Тудор истеъфога чиқарилгандан сўнг, Турин клубини бошқариб қолди. А Сериянинг 18-турида «Ювентус» сафарда «Лечче» билан 1:1 ҳисобида дуранг ўйнади.

Корнеевнинг фикрича, Спаллетти келганидан кейин «Ювентус» анча ўзгарган: жамоа тўпни тез ҳаракатлантиради, тўп гўё футболчилардан ҳам кўпроқ югуради. «Бугун “Лечче” мўъжиза қилиб, дурангни олиб кетди», — дея эксперт сўзларини келтиради «Матч ТВ».

Туринликлар ғалабага яқин эди, бироқ Жонатан Дэвид пенальтини голга айлантира олмади. 33 очко жамғарган «Ювентус» турнир жадвалида тўртинчи ўринда бормоқда.

Abror Tovmurodov

«ZAMIN.UZ» муҳаррири