«Манчестер Сити» Англия Премьер-лигасининг 20-турида «Челси»ни қабул қилди ва учрашув 1:1 ҳисобида якунланди. Мезбонлар 42-дақиқада Тижани Рейндерснинг зарбаси орқали олдинга чиқди, аммо 90+4-дақиқада Энсо Фернандес сўнгги лаҳзада ҳисобни тенглаштирди. «Сити» учун 90+4 — худди “спойлер”дек: 3 очко қўлда эди, кейин бир зумда учиб кетди.
Учрашув «Челси» учун ҳам алоҳида фонга эга бўлди: клуб Энсо Мареска билан йўллар ажрашганини расман эълон қилган, жамоани эса вақтинча бош мураббий сифатида Калум Макфарлейн бошқаргани қайд этилди.
Абдуқодир Ҳусанов майдонга 51-дақиқада қўшилди — у жароҳат олган Йошко Гвардиол ўрнига тушди. Учрашув давомида Гвардиол билан бирга Рубен Диаш ҳам муаммолар туфайли алмаштирилди.
Энг муҳокамали эпизодлардан бири эса иккинчи бўлим ўрталаридан кейин бўлди: собиқ «Сити» тарбияланувчиси Лиам Делап Ҳусановни реклама тўсиғи томон туртиб юборди ва бу кичик “жанг”га айланиб кетди. Натижада Делап ҳам, Матеуш Нуньеш ҳам сариқ карточка олди.
Эътиборлиси, «Манчестер Сити»нинг расмий ҳисоботида ҳам Делапнинг Ҳусановни тўсиққа учириб юборгани ва бу ҳаракат учун огоҳлантирилгани алоҳида тилга олинган.
ЭКСПЕРТ БАҲОЛАРИ (esteemedkompany.com):
Жанлуижи Доннарумма — 7/10:
Битта ажойиб сейвни амалга оширди ва “Челси”нинг жавоб голини олдини олишда деярли ҳеч нарса қила олмади.
Матеуш Нуньеш — 7,5/10:
Нуньешдан рақиб ҳужумкор футболчиси Педро Нетуга қарши яна бир ишончли ўйин.
Рубен Диаш — 7/10:
Рубен Диашнинг яна бир барқарор чиқиши. Ҳимояда ишончли ўйнади ва жамоаси ўйинини қўллаб-қувватлаб турди.
Йошко Гвардиол — 6,5/10:
Афсуски, Гвардиол жароҳат олди ва 50-дақиқада алмаштирилди. Шу пайтгача у яхши ўйнаётган эди. Унинг жароҳати жуда жиддий эмас, деб умид қилинмоқда.
Нико О’Райли — 6,5/10:
Керак бўлган пайтларда ҳимояда яхши ҳаракат қилди ва яккакурашларда ғалаба қозонди. Ҳужумда эса у қадар яхши кўринмади, чунки чарчагандек эди. Афсуски, О’Райли Мало Густога қарши ҳал қилувчи яккакурашда ютқазди, бу эса “Челси”нинг ўйин охиридаги жавоб голига олиб келди. Бу О’Райли учун ўйин сўнгидаги қаттиқ сабоқ бўлди.
Родри — 9/10:
Родридан ажойиб ўйин. У тўп билан ҳам, тўпсиз ҳам жуда юқори даражада ҳаракат қилди. Родри “Манчестер Сити” футболчилари орасида энг юқори баҳо олди.
Тижани Рейндерс — 7,5/10:
Рейндерснинг голи жуда чиройли бўлди, аммо умуман олганда, унинг ўйини ҳам экспертларга маъқул келди. У “Сити”га тўп назоратида устунлик қилишга ёрдам берди ва Премьер-лигада ўйнаш учун нима кераклигини яхши тушунадиган футболчи экани кўриниб турибди.
Бернарду Силва — 7/10:
Бернарду Силвадан яна бир профессионал ўйин. У жамоа манфаати учун бор кучини берди.
Райан Шерки — 6/10:
Шерки учун энг яхши ўйин эмас. Айрим пайтларда у тўпни ҳаддан ортиқ ушлаб қолди, техникаси эса қониқарли эмас эди.
Фил Фоден — 6/10:
Фодендан яна бир омадсиз ўйин. У қарор қабул қилишда хатолар қилди ва чарчаган футболчидек кўринди.
Эрлинг Холанд — 6,5/10:
Холанд тўпни устунга теккизди ва ўз имкониятларига эга бўлди. Афсуски, у гол ура олмади ва бу ҳал қилувчи омилга айланди.
Захирадан тушганлар:
Абдуқодир Ҳусанов — 7/10:
Экспертларнинг фикрича, Ҳусанов алмашувдан кейин ажойиб ўйнади. У Лиам Делап томонидан бўлган хавфни яхши бартараф этди ва ишончли ўйин кўрсатди. Анча фаол ҳаракат қилди.
Жереми Доку — 6/10:
Ёрқин лаҳзалар бўлди, аммо у ўйинга ўзи истагандек таъсир ўтказа олмади.
“Zamin”ни Telegram'да ўқинг!
