Африка Миллатлар кубогида нимчоракфинал босқичининг навбатдаги тўқнашуви мухлисларга ҳақиқий шоу тақдим этди. Нигерия терма жамоаси Мозамбикка қарши майдонга тушиб, рақибни ҳеч қандай жавоб голи уриш имкониятисиз қолдирди ва ишончли 4:0 ҳисобида ғалаба қозонди.
Учрашувнинг биринчи бўлимида “супер бургутлар” тезда ташаббусни қўлга олди. 20-дақиқада Адемола Лукман ҳисобни очиб, жамоасини олдинга бошлади. Орадан кўп ўтмай, 25-дақиқада Виктор Осимҳен ўз сўзини айтиб, устунликни икки баробарга оширди. Демак, биринчи таймнинг ўзиёқ Нигерия учун “ҳамма нарса назоратда” деган сценарийни чизиб берди.
Иккинчи бўлимда эса Нигерия газни янада босди. 47-дақиқада Осимҳен яна бир бор дарвозани ишғол қилиб, дубль қайд этди ва учрашув тақдирини амалда ҳал қилди. Якуний нуқтани эса 75-дақиқада Адамс қўйди — 4:0. Қизиғи шундаки, Лукман ва Адамс фақат гол билан чекланиб қолмади: ҳар иккиси ҳам 2 тадан ассист амалга ошириб, жамоанинг ҳужумдаги моторларидан бири эканини яна бир бор исботлади.
Шу тариқа, Нигерия 1/4 финалга йўл олди ва энди кейинги босқичда Жазоир — Конго ДР жуфтлиги ғолибига қарши ўйнайди. Қисқаси, олдинда янада қаттиқроқ имтиҳон турибди, аммо бугунги 4:0 — Нигериянинг жиддий мақсадлар билан келганини очиқ айтди.
Маълумот учун, беллашув Африка Миллатлар кубоги нимчоракфинали доирасида 5 январь куни Марокашда бўлиб ўтди.
Африка Миллатлар кубоги. 1/8 финал
Нигерия — Мозамбик 4:0
Голлар: Лукман (20), Осимҳен (25, 47), Адамс (75).
Нигерия таркиби: Нвабали, Осайи-Самуэл, Ажайи, Бэсси, Ониемаэчи, Ониека (Деле-Баширу, 83), Ндиди (Онидика, 83), Ивоби, Лукман (Онуачу, 86), Осимҳен (Симон, 68), Адамс (Чуквуэзе, 86).
Мозамбик таркиби: Силуане (Уррубал, 82), Калила (Нанани, 46), Мешер, Мандава, Ланга, Гуима, Амаде, Катамо, Домингес (Камбала, 46), Вити (Чамито, 61), Бангал (Ратифо, 67).
Огоҳлантиришлар: Ндиди (38), Ониека (45+3), Бангал (62), Бэсси (90+3).
“Zamin”ни Telegram'да ўқинг!
