“Барселона” спорт директори Деку “Реал” бош мураббийи Хаби Алонсонинг лавозимидан кетиши ҳақидаги хабарларга муносабат билдирди. Бу ҳақда euro-football.ru хабар беради.
Унинг айтишича, каталонияликлар диққатини фақат ўз ишларига қаратган ва бошқа клубларда нима бўлаётганини муҳокама қилишни истамайди. Деку “Барселона” ва “Реал”да босим доим кучли бўлишини, натижалар юришмаса, биринчи бўлиб мураббийлар зарба остида қолишини таъкидлади.
Шу билан бирга, Деку Алонсонинг кетиши бироз кутилмаган бўлганини тан олди: унинг фикрича, вақт жуда кам ўтган, “Реал” эса Ла Лигада атиги тўрт очко ортда, Чемпионлар лигасида эса ишлар ёмон эмас. Бироқ у клуб ичидаги вазиятни билмагани учун четдан туриб баҳо беришни тўғри деб ҳисобламаслигини айтди.
Шунингдек, Деку Флик ҳақида гапирар экан, “ҳислар рақамлардан кўпроқ нарсани айтади” дея қўшимча қилди ва “Барселона” Ҳанс-Дитер Флик билан яхши даврлар албатта қайтишига олдиндан ишонганини эслатди.
Маълум қилинишига кўра, “Реал”нинг янги бош мураббийи этиб Альваро Арбелоа тайинланган.
“Zamin”ни Telegram'да ўқинг!
