«Реал» ҳужумчиси Килиан Мбаппе жамоа атрофидаги танқидлар, мухлисларнинг ҳуштаклари ва ярим ҳимоячи Жуд Беллингемнинг ҳолати ҳақида очиқ гапирди. Шанба куни «Мадрид» Ла Лигада «Леванте»ни 2:0 ҳисобида енгган бўлса-да, «Сантьяго Бернабеу»даги муҳит барибир қаттиқ бўлди: ғалабага қарамай, трибуналар жамоани ҳуштаклар билан кутиб олди ва кузатиб қўйди.
Бунинг ортидаги сабаблар ҳам маълум: бунгача «қаймоқранглилар» Испания Суперкубоги финалида имкониятни бой берди, кейин эса мамлакат Кубогидан ҳам чиқиб кетди. Катта клубда натижа талаблари ҳам катта бўлади — мухлис сабр қилишни ёқтирмайди, айниқса шундай пайтда.
Мбаппе эса биринчи навбатда Беллингем ҳақидаги гапларни жойига қўйди. У Жуднинг иқтидорига ҳеч кимда шубҳа бўлиши мумкин эмаслигини таъкидлаб, унинг салоҳияти улкан эканини айтди.
«Беллингемнинг маҳоратига ҳеч кимда шубҳа йўқ. У улкан потенциалга эга. Жуд яхши спорт формасида бўлса, дунёнинг энг яхши футболчиларидан бирига айланади», — деди Мбаппе.
Шу билан бирга, франциялик юлдуз жамоадаги умумий вазиятни ҳам яширмади: ҳозир осон давр эмас, ҳар ким босим ҳис қиляпти. Мбаппе мухлисларнинг норозилигини тушунишини билдирди, аммо эътироз адолатли бўлиши кераклигини ҳам очиқ айтди.
«Ҳозир ҳамма учун қийин давр. Мухлисларнинг норозилигини тушунамиз. Лекин улар битта одамга ёпишиб олмай, ҳаммага эътироз билдиришлари керак. Бу фақат Жуднинг ёки бошқа бировнинг айби эмас. Вазиятни ўзгартириш — бизнинг вазифамиз», — дея урғу берди у.
Яъни, Мбаппе фикрича, жамоа муаммоси якка бир футболчига бориб тақалмайди: майдондаги умумий иш, руҳий ҳолат, натижа учун жавобгарлик — барчаси жамоавий масала. «Реал» даражасида эса ҳар бир ўйин — имтиҳон, ҳар бир хатони трибуна ҳам, ОАВ ҳам катта кўриб юбориши табиий.
Энди эса эътибор Чемпионлар Лигасига қаратилмоқда. «Леванте» устидан ғалаба Ла Лигадаги навбатдаги уч очко бўлса, Европа майдони — бутунлай бошқа босим ва бошқа нарх. Мбаппе ҳам шуни эслатиб, мухлисларни қайтаришнинг ягона йўли — майдондаги ҳаракат ва сифатли ўйин эканини таъкидлади.
«Ла Лигада ғалаба қозондик, энди бор эътиборни Чемпионлар Лигасига қаратишимиз керак. Агар мухлислар бизнинг ҳаракат қилаётганимизни ва яхши ўйнаётганимизни кўришса, яна бизни қўллаб-қувватлашади», — деди у «Монако»га қарши ўйин олдидан ўтказилган матбуот анжуманида.
Қисқаси, «Бернабеу»даги ҳуштак — сигнал. Лекин Мбаппе айтаётган гап битта: жамоа бу босимдан қочмайди, аксинча уни ўзига мотивация қилади. Энди «Реал» учун энг муҳим жавоб — микрофон олдида эмас, майдоннинг ўзида бериладиган жавоб.
“Zamin”ни Telegram'да ўқинг!
