УЕФА Чемпионлар лигаси доирасида Норвегияга сафар қилган «Манчестер Сити» «Будё-Глимт»га қарши учрашувда клуб тарихидаги ўзига хос рекордни қайд этди. «Шаҳарликлар» мазкур баҳсда Чемпионлар лигаси тарихидаги энг ёш старт таркиб билан майдонга чиқди.
Opta статистик мутахассислари келтирган маълумотларга кўра, ушбу ўйинда «Сити»нинг асосий таркибининг ўртача ёши 24 йил 84 кунни ташкил этган. Бу эса манчестерликларнинг Чемпионлар лигасидаги барча иштироклари орасидаги энг ёш старт таркиб сифатида рўйхатга киритилди. Яъни, Гвардиола жамоаси Норвегияда фақат ўйин эмас, бир вақтнинг ўзида келажакка ишора қилувчи тажриба ҳам ўтказди деса бўлади.
Албатта, бундай ёш таркиб билан майдонга тушиш ҳар доим ҳам осон кечмайди. Айниқса, совуқ ҳаво, сафар атмосфераси ва «Будё-Глимт»нинг ўз майдонидаги жанговор руҳи фонга чиққан пайтда. Ўйин жараёнида мезбонлар бундан унумли фойдаланишга ҳаракат қилди ва натижада «Манчестер Сити» мазкур беллашувда 1:3 ҳисобида мағлуб бўлди.
Шунга қарамай, бу статистика «шаҳарликлар» учун муҳим сигнал: клуб Чемпионлар лигасида натижа учун кураш билан бирга, янги авлодни ҳам катта саҳнага чиқаришга жиддий урғу беряпти. Демак, бугунги “оғриқли” сабоқ эртанги катта ғалабалар учун пойдевор бўлиши мумкин.
“Zamin”ни Telegram'да ўқинг!
