Чемпионлар лигаси доирасида Норвегияда ўтган сафар баҳси «Манчестер Сити» учун оғир кечди. Хосеп Гвардиола шогирдлари «Будё-Глимт»га қарши ўйинда 1:3 ҳисобида мағлуб бўлиб, мухлислар кутаётган натижани бера олмади.
Бироқ мағлубиятдан кейин жамоа етакчилари мухлислар олдида жавобгарликни амалда ҳам кўрсатишга қарор қилди. Журналист Саймон Байковски маълумотига кўра, «Манчестер Сити» сардорлари Норвегияга йўл олган клубнинг барча 374 нафар мухлиси учун чипта пулини қайтариб беришни ўз зиммасига олган.
Айтилишича, бу қарор «шаҳарликлар»нинг етакчи футболчиларига қарийб 10 минг фунтга тушган. Жамоа сардорлари бундай вазиятда мухлислар учун қилиб бўладиган энг ками — сафар харажатларининг бир қисмини қоплаб бериш, деб ҳисоблаган.
Бу ҳаракат мухлислар билан жамоа ўртасидаги муносабат қандай қурилганини яна бир бор кўрсатди: ғалаба кунда ҳам, омадсиз кечада ҳам мухлис — жамоанинг энг катта кучидир.
Энди Гвардиола жамоаси навбатдаги учрашувни 24 январь куни ўз майдонида «Вулверхэмптон»га қарши ўтказади. «Сити» учун энг муҳим вазифа — бу мағлубиятни тезроқ унутиб, келаси ўйинда ҳам натижа, ҳам ўйин сифати билан мухлислар ишончини қайта мустаҳкамлаш.
“Zamin”ни Telegram'да ўқинг!
