“Манчестер Сити” бош мураббийи Хосеп Гвардиола майдондан ташқаридаги ижтимоий-сиёсий масалаларга ҳам бефарқ эмаслигини яна бир бор кўрсатди. Мутахассис сўнгги суҳбатларидан бирида дунёдаги турли можаролар ҳақида тўхталиб, бу воқеаларни “ҳар кимга дахлдор умумий дард” сифатида таърифлади.
Гвардиоланинг таъкидлашича, бугун инсонзот тарихида илк бор катта ҳодисаларнинг деярли барчаси кўз ўнгимизда — жонли, тезкор ва очиқ маълумотлар орқали содир бўляпти. Унинг фикрига кўра, бу ҳолат баъзан одамни чарчатади, баъзан эса қалбни оғритади, лекин барибир ҳеч кимни бефарқ қолдирмаслиги керак.
“Инсоният тарихида ҳеч қачон ҳозиргидек аниқ маълумотлар бизнинг кўз ўнгимизда бўлмаган. Жумладан, Фаластиндаги геноцид, Украина ва Россиядаги воқеалар, Судандаги вазият — буларнинг барчаси кўз олдимизда кечяпти. Буни кўришни хоҳлаймизми-йўқми, барибир бу ҳамманинг муаммоси”, — дея ўз фикрини билдирган мураббий.
Унинг айтишича, бу каби мавзулар “кимнингдир муаммоси” бўлиб қолмаслиги керак: ахборот замонида ҳеч ким четда тура олмайди, чунки уруш ва зўравонликнинг сояси барибир барчага етиб боради — кайфиятга ҳам, инсон руҳиятига ҳам, келажакка бўлган ишончга ҳам.
Эслатиб ўтамиз, 2022 йил февраль ойидан бери Россия қуролли кучлари Украинада “махсус ҳарбий операция” олиб бормоқда. Гвардиоланинг бу чиқиши эса мухлисларга таниш бир ҳақиқатни яна эслатди: баъзан футбол ҳам жим тура олмайди — чунки у ҳам одамлар яшайдиган дунё ичида.
“Zamin”ни Telegram'да ўқинг!
