Италия чемпионатида кучли бешликка яқинлашиб келаётган «Комо» шанба куни ўз майдонида аутсайдер «Фиорентина»ни қабул қилди. Бу ҳақда euro-football.ru хабар беради.
Учрашувнинг биринчи бўлими ўрталарида флоренсияликлар ҳисобни очди: Николо Фаджоли дастлаб ҳимоячига теккан зарбадан сўнг қайтган тўпни иккинчи уринишда аниқ якунлаб, меҳмонларни олдинга олиб чиқди — 0:1.
54-дақиқада «Фиорентина» устунлигини оширди — Мойзе Кин пеналтини совуққонлик билан ижро этди: тўп бурчакка йўналди, дарвозабон эса жойидан қимирламади — 0:2. Орадан кўп ўтмай Мартин Батурина узоқдан хавфли зарба йўллади, бироқ тўп дарвоза устунига яқин жойдан ўтиб кетди.
70-дақиқада меҳмонлар бош мураббийи Паоло Ваноли ҳакамга айтилган гаплари учун майдондан четлатилди. 77-дақиқада эса «Комо» ҳисобни қисқартирди: Альваро Моратанинг бош билан йўллаган зарбасидан кейин тўп Фабиано Паризига тегиб, дарвозага кириб кетди — 1:2. Ўйин якунида Мората жанжалда иштирок этиб, қизил карточка олди.
Ғалабага қарамай, «Фиорентина» турнир жадвалида пастдан учинчи ўринда қолмоқда. «Комо» эса олтинчи поғонада бормоқда.
“Zamin”ни Telegram'да ўқинг!
