Мюнхеннинг «Бавария» клуби ҳужумчиси Гарри Кейн Дортмунднинг «Боруссия»сига қарши 3:2 ҳисобидаги ғалабадан сўнг журналистлар саволларига жавоб берди. Бу ҳақда euro-football.ru хабар беради.
Англиялик форвард учрашув қаҳрамонига айланди: у икки бор рақиб дарвозасини ишғол қилди. Бу натижадан кейин «Бавария» Бундеслигада иккинчи ўринда бораётган «Боруссия» билан орадаги фарқни 11 очкога етказди.
Кейннинг таъкидлашича, жамоа чемпионлик пойгасидаги энг муҳим баҳслардан бирини ютган. «Ҳисобда ортда қолган бўлсак ҳам, ўз ўйинимиздан воз кечмадик. Ҳафта ўртасида Чемпионлар лигасида ўйнаганидан кейин «Боруссия» чарчашини билардик. Таслим бўлмадик. Бу ерга келиб ғалаба қозониш — алоҳида туйғу. Ўзимиз билан фахрлансак бўлади», — деди у.
Кейн жорий Бундеслига мавсумида аллақачон 30 та гол уриб улгурди. Чемпионат якунга қадар эса яна 10 та тур қолган.
“Zamin”ни Telegram'да ўқинг!
