Жорий йилнинг энг яхши футболчиси деб топилган ва "Олтин тўп" совринини қўлга киритган Родри фаолиятини бошқа клубда давом эттириши мумкин. "Манчестер Сити" раҳбарияти испаниялик ярим ҳимоячини ёзги трансферлар ойнаси вақтида сотишга тайёр эканлигини маълум қилди. Клуб футболчи билан тузилган шартнома 2027 йил ёзида якунланишини инобатга олиб, уни 50 миллион евро эвазига қўйиб юборишга қарор қилган.
Ушбу футболчига узоқ вақтдан буён "Реал Мадрид" жиддий қизиқиш билдириб келмоқда. Родри ҳам ўз интервьюларида "Қироллик клуби" сафида тўп суриш унинг болаликдаги орзуси эканлигини яширмаган. Шунга қарамай, Мадрид клуби мутасаддилари шошилинч қарор қабул қилмоқчи эмас. Улар аввало футболчининг жисмоний ҳолатини ва жаҳон чемпионатидаги ўйинларини диққат билан кузатиб, таҳлил қилишни режалаштирган.
Эслатиб ўтамиз, Родри 2019 йилда "Атлетико" сафидан 70 миллион евро эвазига "Манчестер Сити" таркибига келиб қўшилган эди. Ҳозирги кунда нуфузли Transfermarkt портали футболчининг бозор қийматини 75 миллион евро деб баҳоламоқда. Агар трансфер амалга ошса, бу ёзги мавсумнинг энг шов-шувли ўтишларидан бирига айланиши шубҳасиз.
“Zamin”ни Telegram'да ўқинг!
