Аргентина терма жамоаси сардори Лионель Мессининг «Интер Майами» сафидаги молиявий даромадлари ҳақида янги маълумотлар пайдо бўлди. Клуб хўжайини Хорхе Маснинг таъкидлашича, футболчининг йиллик даромади турли бонуслар ва клубдаги улушларни ҳисобга олганда 70 миллиондан 80 миллион долларгача етиши мумкин.
МЛС футболчилар уюшмаси томонидан эълон қилинган расмий ҳисоботда эса бироз бошқача рақамлар келтирилган. Унга кўра, аргентиналик юлдузнинг базавий маоши 12 миллион долларни ташкил этади. Агар шартномадаги барча кафолатланган бонуслар ва қўшимча тўловлар йиллик ҳисобда жамланса, бу кўрсаткич 20,45 миллион долларга тенг бўлади.
Мутахассисларнинг фикрича, Мессининг АҚШга кўчиб ўтиши нафақат спорт, балки бизнес нуқтаи назаридан ҳам катта муваффақият бўлди. Унинг «Интер Майами» таркибидаги иштироки нафақат клуб даромадларини, балки бутун Америка чемпионати нуфузини кескин ошириб юборди. Ҳозирда футболчи нафақат майдондаги ўйини, балки тижорий шартномалари орқали ҳам дунёнинг энг кўп даромад топувчи спортчилари қаторида қолмоқда.
“Zamin”ни Telegram'да ўқинг!
