Гонконгда 2–8 март кунлари ўтказилган U18 ёш тоифасидаги хоккей бўйича жаҳон чемпионати Ўзбекистон терма жамоаси учун ҳақиқий байрамга айланди. Йигитларимиз мусобақада идеал натижа қайд этиб, 5 та ўйинда 5 та ғалабани қўлга киритди ва бу муваффақият орқали юқорироқ дивизион — IIB гуруҳига йўлланмага эга бўлди.
Энг ҳал қилувчи, энг шиддатли тўқнашувда терма жамоамиз Исроилни 6:3 ҳисобида мағлуб этиб, чемпионликни расмийлаштирди ва олтин медални қўлга киритди. Ўйиндаги темп, характер ва охиригача кураш — айнан шу жиҳатлар жамоамизнинг бу турнирдаги асосий кучига айланди.
Бугун эса ғолиблар Ватанга қайтди. Ислом Каримов номидаги Тошкент халқаро аэропортида музаффар хоккейчиларимизни тантанали кутиб олиш маросими бўлиб ўтди. Унда Спорт вазирлиги ва мамлакат хоккей федерацияси мутасаддилари, спортчиларнинг ота-оналари ҳамда кенг жамоатчилик иштирок этди. Ғолибларга қутловлар айтилди, қўллаб-қувватлов билдирилди ва кейинги мусобақаларда ҳам омад тилаклари билдирилди.
Қисқаси, бу ғалаба — фақат бир турнир натижаси эмас. Бу Ўзбекистон хоккейи учун навбатдаги босқичга чиққан, ишонч ва руҳ берган катта қадам. Энди эса янги дивизионда янги синовлар кутади — ва бизда бу жамоа унга ҳам тайёр деган ишонч бор.
“Zamin”ни Telegram'да ўқинг!
