Мадриднинг "Real" клуби ҳужумчиси Килиан Мбаппе айни дамда тиззасидаги жароҳатни даволаш билан банд. Шунга қарамай, футболчи март ойида АҚШда ўтказиладиган ўртоқлик ўйинларида Франция терма жамоаси таркибида бўлиши кутилмоқда. AS нашрининг хабар беришича, Мбаппе 26 март куни Бразилия ва 29 март куни Колумбияга қарши кечадиган баҳслар учун қайдномага киритилган.
Мутахассисларнинг фикрича, футболчининг океан ортига сафари кўпроқ тижорий мақсадлар ва ҳомийлар олдидаги мажбуриятлар билан боғлиқ. Агар юлдуз футболчи мазкур сафарда иштирок этмаса, Франция футбол федерацияси катта миқдордаги молиявий йўқотишларга учраши мумкин. Шунинг учун ҳам томонлар вазиятни эҳтиёткорлик билан баҳоламоқда.
Бироқ бош мураббий Дидье Дешам ва тиббиёт ходимлари Килианнинг соғлиғини хавф остига қўйиш ниятида эмас. Агар футболчи ўзини тўлиқ соғлом ҳис қилмаса, у майдонга туширилмайди. Асосий мақсад Мбаппени бўлажак жаҳон чемпионатига энг юқори спорт формасида етказиб боришдир. Футболчининг ўзи ҳам тикланиш жараёнини тезлаштирмасликка ва таваккал қилмасликка қарор қилган.
Ҳатто Мбаппе "Manchester City"га қарши Европа Чемпионлар лигасининг ҳал қилувчи баҳсларини ҳам ўтказиб юборишга тайёр турибди. Бу ҳолат Франция футбол жамоатчилигида жиддий хавотирларни келтириб чиқармоқда. Эслатиб ўтамиз, ўтган Европа чемпионатида ҳам Мбаппе бурнидан олган жароҳати сабабли ўз имкониятларини тўлиқ намойиш эта олмаган эди. Ҳозирги вазиятда эса унинг тиззасидаги муаммо жамоа учун янада оғриқли нуқтага айланган.
“Zamin”ни Telegram'да ўқинг!
