Эрон спорт вазири Аҳмад Дунёмали мамлакат миллий терма жамоасининг 2026 йил АҚШда ўтадиган Жаҳон чемпионатида қатнашиши борасида қаттиқ позиция билдирди. Унинг айтишича, сўнгги сиёсий воқеалар, йўқотишлар ва умумий вазият фонида терманинг турнирга бориши амалда имконсиз кўринаяпти.
Вазир баёнотида жуда оғир руҳий фон сезилади. У “бизга саккиз ёки тўққиз ой ичида иккита уруш тиқиштирилди” деган мазмунда гапириб, бундай вазиятда спорт ҳақида ўйлаш ҳам қийин эканини таъкидлаган. Шунингдек, у “минглаб ватандошлар ҳалок бўлди” деган фикрларни ҳам келтириб, Жаҳон чемпионатида иштирок этиш учун “ҳеч қандай шароит қолмагани”ни айтган.
"Коррупцияга ботган ҳукумат томонидан етакчимиз ўлдирилганидан сўнг, Жаҳон чемпионатида иштирок этишимиз учун ҳеч қандай шароит қолмади.
Эронга қарши амалга оширилган шафқатсиз ҳаракатлар фонида — саккиз ёки тўққиз ой ичида бизга иккита уруш тиқиштирилди ва бунинг оқибатида минглаб ватандошларимиз ҳалок бўлди. Бундай оғир шароитда мусобақада қатнашиш учун бизда умуман имконият йўқ", — деди Дунёмали.
Бу баёнотлар фонида FIFA томонидан бошқа сигналлар ҳам бор. Масалан, FIFA президенти Жанни Инфантино АҚШ президенти Доналд Трамп билан учрашувдан кейин Эрон термаси ЖЧ–2026да қатнашиши мумкинлигини, Трамп бу масалада “Эрон жамоасига эшик очиқ” эканини айтганини билдирган.
Яъни ҳозир вазият шундай: бир тарафда — Эрон ичидаги масъуллар “бундай оғир шароитда турнирга боришнинг ўзи мушкул” дея кескин гапиряпти, иккинчи тарафда — FIFA ва АҚШ томонидан “қатнашиш мумкин” деган расмийроқ позиция кўринади. Шу сабаб бу мавзу атрофидаги ноаниқлик ҳали анча давом этиши эҳтимол.
Эслатиб ўтамиз, 2026 йилги Жаҳон чемпионати 11 июндан 19 июлга қадар АҚШ, Канада ва Мексика майдонларида бўлиб ўтади.
“Zamin”ни Telegram'да ўқинг!
