Африка футбол конфедерацияси томонидан кескин қарор қабул қилиниб, Сенегал миллий терма жамоаси қитъа чемпионилик унвонидан маҳрум этилди. Бу воқеа футбол жамоатчилигида катта муҳокамаларга сабаб бўлмоқда.
Маълум қилинишича, икки ой аввал Африка Миллатлар кубоги финалида Марокаш устидан ғалаба қозонган Сенегал термаси норозилик белгиси сифатида майдонни тарк этгани учун жазога тортилди. Шу ҳолат мусобақа регламентига зид деб топилиб, жамоага техник мағлубият ёзилди.
Африка футбол конфедерациясининг апелляция кенгаши қарорига мувофиқ, AFCON регламентининг 84-моддаси асосида Сенегал финал учрашувини ютқазган деб эълон қилинди. Натижада, Марокаш терма жамоасига 3:0 ҳисобида техник ғалаба ёзилди ва улар расман қитъа чемпиони сифатида тан олинди.
Эслатиб ўтиш жоиз, ўша финал баҳсида Сенегал футболчилари норозилик сифатида майдонни тарк этган бўлса-да, жамоа етакчиси Садио Мане шерикларини ўйинга қайтишга чақирган эди. Учрашув давомида қўшимча вақтнинг 4-дақиқасида Пап Гейе ҳисобни очиб, якунда айнан шу гол Сенегалга ғалаба келтирганди.
Бироқ қабул қилинган қарор натижани бутунлай ўзгартирди ва чемпионлик Марокашга топширилди. Бу ҳолат футболда интизом ва қоидаларга риоя қилиш нақадар муҳим эканини яна бир бор кўрсатди.
“Zamin”ни Telegram'да ўқинг!
