Англия Премьер-лигасининг амалдаги грандларидан бири — «Манчестер Сити» сафидаги энг тажрибали марказий ҳимоячилардан бири Жон Стоунз жорий мавсум якунига етгач жамоани тарк этиши мумкин. “Шаҳарликлар” ҳимоя чизиғида узоқ йиллар давомида ишончли ўйин намойиш этган футболчининг келажаги ҳозирча ноаниқлигича қолмоқда.
TEAMtalk нашри тарқатган маълумотларга кўра, 31 ёшли инглиз футболчисига унинг собиқ жамоаси — «Эвертон» жиддий қизиқиш билдирмоқда. Мерсисайдликлар тажрибали ҳимоячини яна ўз сафига қайтариш ниятида ва бу борада қулай имкониятни кутмоқда.
Манбага кўра, «Эвертон» раҳбарияти Стоунзни ёзги трансферлар ойнасида эркин агент сифатида жамоага қўшиб олишни режалаштирган. Маълумки, унинг «Манчестер Сити» билан амалдаги шартномаси айнан шу даврда ўз якунига етади.
Эслатиб ўтамиз, Жон Стоунз 2016 йилда «Эвертон»дан 55 миллион евро эвазига «Манчестер Сити»га кўчиб ўтган эди. Шу вақтдан бери у жамоанинг асосий фигураларидан бирига айланиб, кўплаб совринларни қўлга киритишда муҳим роль ўйнади.
Бироқ сўнгги вақтларда ҳимоячининг жароҳатларга мойиллиги унинг ўйин амалиётига жиддий таъсир кўрсатмоқда. Жорий мавсумда у барча мусобақаларда атиги 15 та учрашувда иштирок этди. Бу эса футболчининг асосий таркибдаги ўрнини ҳам шубҳа остига қўя бошлади.
Агар трансфер амалга ошса, Стоунз учун бу нафақат янги чақириқ, балки ўз фаолиятини бошлаган жамоага рамзий қайтиш бўлади. Энди барча савол — «Сити» уни қўйиб юборадими ва «Эвертон» бу имкониятдан фойдаланадими?
“Zamin”ни Telegram'да ўқинг!
