Туркиянинг «Истанбул Башакшеҳир» клуби ҳужумчиси, Ўзбекистон миллий жамоаси сардори Элдор Шомуродов юртимизга етиб келиб, миллий жамоа йиғинига қўшилди. Терма жамоа ҳозирда муҳим халқаро учрашувлар олдидан тайёргарлик жараёнини олиб бормоқда.
Футболчи таъкидлашича, жамоа аъзолари босқичма-босқич келиб қўшилди ва ҳозирда таркиб тўлиқ шаклланган. «Куни кеча йиғинга келиб қўшилдик, бугун эса барча футболчилар етиб келди. Олдинда иккита муҳим ўртоқлик ўйинлари бор. Жамоа тўлиқ тайёр ҳолатда», — деди у.
Шомуродов жамоада Аббосбек Файзуллаев йўқлиги ҳақида ҳам фикр билдирди. Унинг айтишича, Файзуллаевнинг қатнашмаслиги албатта сезиларли йўқотиш, аммо футболчи кичик жароҳатдан кейин тез орада сафга қайтиши кутилмоқда.
Ҳужумчи ўзининг клубдаги сўнгги ўйинларда гол ура олмаётганига ҳам тўхталиб ўтди. У бундай ҳолатлар ҳар бир футболчи фаолиятида учраб туришини, энг муҳими эса жамоавий натижа эканини таъкидлади.
Габон ва Венесуэлага қарши бўлажак учрашувлар ҳақида гапирган сардор, ушбу йиғин Жаҳон чемпионати олдидан сўнгги имконият эканини қайд этди. Унга кўра, бу ўйинлар орқали жамоа ўз имкониятларини синаб кўради, янги футболчилар эса ўзини намоён қилиш имконига эга бўлади.
Шунингдек, у FIFA Series халқаро турнири оддий ўртоқлик ўйинларига нисбатан анча қизиқарли эканини айтди. «Ҳатто кичик мусобақа бўлса ҳам, у ўйинларга бошқача руҳ бағишлайди. Бу нафақат футболчилар, балки мухлислар учун ҳам манфаатли», — дея қўшимча қилди Шомуродов.
Мазкур йиғин миллий жамоа учун жиддий синов бўлиб, жамоанинг келгуси катта мусобақалар олдидан қандай ҳолатда эканини кўрсатиб беради.
“Zamin”ни Telegram'да ўқинг!
