Ярим оғир вазн тоифасидаги WBC чемпиони Дэвид Бенавидез украиналик машҳур чарм қўлқоп устаси Александр Усик ҳақида жуда юқори фикр билдирди. Унинг таъкидлашича, ҳозирги авлод орасида Усикка тенг келадиган боксчи йўқ.
“Усик, шубҳасиз, бугунги куннинг энг кучли ва рақобатсиз боксчиси. У кетма-кет икки катта жангда ғалаба қозонди ва шу билан ўз даражасини янада мустаҳкамлади. Менимча, ҳозир ҳеч ким унинг савиясига яқинлаша олмайди”, — дея таъкидлади Бенавидез.
У, шунингдек, Усикнинг карьерасидаги энг муҳим босқичларга ҳам тўхталиб ўтди. Аввалига биринчи оғир вазн тоифасида энг кучли рақиблар билан рингга чиққан украиналик спортчи кейинчалик оғир вазнга ўтиб, кўпчиликни ҳайратда қолдирган. Кўплаб мутахассислар унинг янги вазнда муваффақият қозонишига ишонмаган бўлса-да, Усик ўз жанглари орқали барча шубҳаларни йўққа чиқарди.
"Ёдингизда бўлса, у биринчи оғир вазн тоифасида ҳам энг кучли рақиблар билан жанг қилганди. Кейин оғир вазнга ўтди. Ўшанда ҳеч ким Александрнинг имкониятини юқори баҳоламади. Бироқ Усик у ерда ҳам барчани нокаутга учратди ва шу орқали ҳаммани лол қолдирди", – дея Бенавидезнинг сўзларидан иқтибос келтирди "Boxing News".
Бенавидез фикрича, айнан шу жасорат ва барқарор натижалар Усикни замонамизнинг энг улуғ боксчиларидан бирига айлантирган.
Маълумот учун, Александр Усик навбатдаги жангини афсонавий кикбоксчи Рико Верховенга қарши 23 май куни Мисрда ўтказиши режалаштирилган. Бу тўқнашув ҳам спорт мухлислари томонидан катта қизиқиш билан кутилаётгани табиий.
“Zamin”ни Telegram'да ўқинг!
