“Ливерпуль”нинг собиқ бош мураббийи Юрген Клопп Мадриднинг “Реал” клубини бошқариши мумкинлиги борасида тарқалган хабарларга ўз муносабатини билдирди. Германиялик мутахассис 2023-2024 йилги мавсум охирида “Ливерпуль”ни тарк этган ва ҳозирда Red Bull корпорацияси тизимида глобал футбол бўйича раҳбарлик вазифасини бажармоқда.
Клоппнинг таъкидлашича, “Агар “Реал Мадрид” раҳбарлари ҳақиқатан ҳам қўнғироқ қилганида, биз бу ҳақда аллақачон хабар топган бўлардик. Бу хабарлар эса тўлиқ сафсата. Улар бирор марта ҳам менга ёки агентимга қўнғироқ қилмади”, — деди мутахассис.
Шу билан бирга, у келажакда мураббийлик фаолиятига қайтиши мумкинлигини умуман истисно қилмади. “Ҳозир бу ҳақда ўйламаяпман ва ҳеч қандай режам йўқ. Ҳа, ёшим анча катта, лекин мураббий сифатида ҳали ўз фаолиятимни тугатганим йўқ. Ким билади, келажакда нима бўлишини? Лекин ҳозирча ҳеч қандай режа йўқ”, — деди Клопп.
Эслатиб ўтамиз, аввалроқ Клоппнинг “Ливерпуль”га қайтиши мумкинлиги ҳақида ҳам гап-сўзлар тарқалган эди, бу эса унинг ўрнини эгаллаган Арне Слотнинг фаолиятидаги қийинчиликлар билан боғлиқ эди.
